ព័ត៌មានអន្ដរជាតិ

មានការផ្សព្វផ្សាយ ថា ទាហានអ៊ីស្រាអែលម្នាក់ស្លាប់ និងរបួស១១នាក់ នៅភាគខាងត្បូងលីបង់

បានផុស

១៩ វិនាទី មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

ស្ថាប័នអន្តរជាតិ និងប្រធានាធិបតីអាមេរិក លោក ដូណាល់ ត្រាំ ប្រាប់មេដឹកនាំអ៊ីស្រាអែលដដែលៗថា ឱ្យឈប់វាយប្រហារលីបង់ ព្រោះអាចនឹងប៉ះពាល់ដល់កិច្ចព្រមព្រៀងបញ្ចប់សង្រ្គាមអាមេរិក-អ៊ីរ៉ង់ តែមកទល់ពេលនេះនៅតែទទួលដំណឹងថា មានមនុស្សស្លាប់និងរបួសជាបន្តបន្ទាប់ ពិសេសស្លាប់ទាំងកងទ័ពអ៊ីស្រាអែល ដែលអាចជំរុញឲ្យជម្លោះនោះកើនឡើងកម្តៅសារជាថ្មិនៅក្នុងតំបន់។

ប្រព័ន្ធផ្សព្វផ្សាយអ៊ីស្រាអែលរាយការណ៍ កាលពីថ្ងៃព្រហស្បតិ៍ ថា ទាហានអ៊ីស្រាអែលម្នាក់ស្លាប់និងរងរបួស ១១នាក់ នៅភាគខាងត្បូងប្រទេសលីបង់ ដោយអ្នករងរបួសមួយចំនួនស្ថិតក្នុងស្ថានភាពធ្ងន់ធ្ងរខ្លាំង នៅប៉ុន្មានម៉ោងចុងក្រោយនេះ។

ការវាយប្រហារតាមអាកាសរបស់អ៊ីស្រាអែលលើលីបង់។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយ Al Mayadeen English ដែលមានមូលដ្ឋាននៅប្រទេសលីបង់ បានឱ្យដឹងថា ឧប្បត្តិហេតុមួយផ្សេងទៀតបានកើតឡើងកាលល្ងាចថ្ងៃពុធ ពាក់ព័ន្ធនឹងដ្រូនវាយប្រហារតាមដងផ្លូវ ធ្វើឡើងដោយក្រុមហេសបូឡា បណ្តាលឱ្យជនជាតិអ៊ីស្រាអែល ៧នាក់ រងរបួស។

ដោយឡែកមានការណីផ្ទុះមួយដោយមិនបានគ្រោងទុក បានកំណត់គោលដៅលើអង្គភាពយោធាអ៊ីស្រាអែលមួយ នៅភាគខាងត្បូងប្រទេសលីបង់ បណ្តាលឱ្យមានអ្នករងរបួសបន្ថែមចំនួន ៤នាក់ ហើយ ២នាក់ស្ថិតក្នុងស្ថានភាពធ្ងន់ធ្ងរ។

ក្រសួងសុខាភិបាលអ៊ីស្រាអែលទទួលស្គាល់ថា មានអ្នករងរបួសចំនួន ៩ ២៣០នាក់ ត្រូវកត់ត្រា នៅក្នុងមន្ទីរពេទ្យចាប់តាំងពីការចាប់ផ្តើមនៃប្រតិបត្តិការ Roaring Lion កាលពីថ្ងៃទី២៨ ខែកុម្ភៈ ។ នេះបើយោងតាមទិន្នន័យចេញផ្សាយ គិតត្រឹមយប់ថ្ងៃពុធ។

ក្រសួងនិយាយថា អ្នករងរបួសថ្មីចំនួន ២១នាក់ត្រូវបានកត់ត្រា ចាប់តាំងពីការរកឃើញចុងក្រោយចេញផ្សាយកាលពីថ្ងៃចន្ទ បង្ហាញពីការចូលសម្រាកព្យាបាលជាបន្តបន្ទាប់។

យោងតាមតួលេខចេញផ្សាយ មន្ទីរពេទ្យអ៊ីស្រាអែលបានកត់ត្រាអ្នករងរបួសចំនួន ១ ៣៣១នាក់ នៅភាគខាងជើង បន្ទាប់ពីបទឈប់បាញ់ជាមួយអ៊ីរ៉ង់ចូលជាធរមាន ខណៈអ្នករងរបួសចំនួន ៩១៣នាក់ ត្រូវបានកត់ត្រាដូចគ្នា បន្ទាប់ពីបទឈប់បាញ់ជាមួយលីបង់៕

សម្រួល៖ ណឺ មិនា