ហេតុអ្វី​បក្សធំៗទាំងពីរនៅអាមេរិក តែងតែបន្តជួយជ្រោមជ្រែងអ៊ីស្រាអែល ក្នុង​សង្គ្រាម?

នៅក្នុងពិភពនយោបាយអាមេរិកដែលមានភាពបែកបាក់ និងការប្រជែងគ្នាយ៉ាងខ្លាំង​រវាងគណបក្សប្រជាធិបតេយ្យ (Democrats) និងគណបក្សសាធារណរដ្ឋ (Republicans) គេសង្កេតឃើញថា មានរឿងរ៉ាវតិចតួចណាស់ ដែលអាចធ្វើឱ្យគណបក្សទាំងពីរនេះស្របគំនិតគ្នាបាន។ គោលនយោបាយការបរទេសចំពោះ «រដ្ឋអ៊ីស្រាអែល» បានក្លាយជាចំណុចរួមមួយដ៏រឹងមាំអស់រយៈពេលជាច្រើនទសវត្សរ៍មកហើយ។ ការគាំទ្រដោយឯកច្ឆន្ទពីសំណាក់បក្សធំៗទាំងពីរនេះ មិនមែនកើតឡើងដោយចៃដន្យនោះទេ ប៉ុន្តែវាត្រូវបានផ្សារភ្ជាប់យ៉ាងស៊ីជម្រៅទៅនឹងផលប្រយោជន៍យុទ្ធសាស្ត្រ សេដ្ឋកិច្ច និងនយោបាយផ្ទៃក្នុងរបស់សហរដ្ឋអាមេរិក។

ដើម្បីយល់ដឹងកាន់តែច្បាស់អំពីឫសគល់នៃសម្ព័ន្ធភាពនេះ យើងត្រូវពិនិត្យមើលកត្តាសំខាន់ៗចំនួន ៣ ដូចខាងក្រោម៖

១. ផលប្រយោជន៍យុទ្ធសាស្ត្រ និងសន្តិសុខនៅមជ្ឈិមបូព៌ា

ចាប់តាំងពីសម័យសង្គ្រាមត្រជាក់មក សហរដ្ឋអាមេរិកបានមើលឃើញថា តំបន់មជ្ឈិមបូព៌ា គឺជាតំបន់ភូមិសាស្ត្រនយោបាយដ៏សំខាន់ និងមានភាពវឹកវរខ្លាំង។ ក្នុងន័យនេះ អ៊ីស្រាអែលត្រូវបានចាត់ទុកជា «ប៉ុស្តិ៍យាមដ៏រឹងមាំ» របស់អាមេរិក នៅក្នុងតំបន់ដែលពោរពេញទៅដោយរដ្ឋាភិបាលប្រឆាំងនឹងលោកខាងលិច។ អ៊ីស្រាអែល ជាប្រទេសប្រកាន់របបប្រជាធិបតេយ្យតែមួយគត់នៅក្នុងតំបន់នោះ ដែលមានប្រព័ន្ធស៊ើបការណ៍សម្ងាត់ និងកងទ័ពដ៏មានសមត្ថភាពខ្ពស់។ តាមរយៈកិច្ចសហការនេះ អាមេរិកទទួលបានព័ត៌មានសម្ងាត់សំខាន់ៗអំពីក្រុមភេរវករ និងចលនារបស់ប្រទេសជាគូប្រជែង ដូចជា អ៊ីរ៉ង់ជាដើម។

យោងតាមការចុះផ្សាយរបស់សារព័ត៌មាន PBS NewsHour ទំនាក់ទំនងទ្វេភាគីរវាង​ក្រុង​វ៉ាស៊ីនតោន និង​ក្រុង​ទែលអាវីវ តែងតែមានភាពរឹងមាំជាប្រវត្តិសាស្ត្រ ទោះ​ពេលខ្លះមានការរកាំរកូសរវាងមេដឹកនាំ និងមេដឹកនាំក៏ដោយ។ ការគាំទ្រនេះ ត្រូវបានចាក់គ្រឹះយ៉ាងមាំ រហូតដល់ថ្នាក់ប្រធានាធិបតី ដូណាល់ ត្រាំ ធ្លាប់បានលើកឡើងថា «បើគ្មានសហរដ្ឋអាមេរិកទេ នោះក៏គ្មានរដ្ឋអ៊ីស្រាអែលដែរ» ដែលនេះស្តែងឱ្យឃើញពីកម្រិតនៃការការពារដ៏ជិតស្និទ្ធរបស់អាមេរិក។

២. ទំនាក់ទំនងឧស្សាហកម្មយោធា និងបច្ចេកវិទ្យា

ការជួយជ្រោមជ្រែងរបស់អាមេរិកទៅលើអ៊ីស្រាអែល មិនមែនជាការផ្តល់ជំនួយដោយឥតសំណង និងឥតប្រយោជន៍នោះទេ។ ជារៀងរាល់ឆ្នាំ អាមេរិកបានផ្តល់ជំនួយយោធាប្រមាណជិត ៤ពាន់លានដុល្លារដល់អ៊ីស្រាអែល ប៉ុន្តែថវិកាទាំងនោះភាគច្រើនត្រូវយកមកទិញអាវុធ និងបរិក្ខារយោធាពីក្រុមហ៊ុនផលិតអាវុធរបស់អាមេរិកផ្ទាល់ ដែលវាជួយបង្កើតការងារ និងជំរុញសេដ្ឋកិច្ចអាមេរិក។

លើសពីនេះ ទំនាក់ទំនងនេះ បានវិវត្តទៅជាការរួមបញ្ចូលគ្នានៃខ្សែសង្វាក់ផ្គត់ផ្គង់បច្ចេកវិទ្យាការពារជាតិយ៉ាងស៊ីជម្រៅ។ យោងតាមអត្ថបទវិភាគរបស់ទស្សនាវដ្តី Jewish Currents គំរូនៃ​ការផ្តល់ជំនួយនាពេលបច្ចុប្បន្ន បាននិងកំពុងផ្លាស់ប្តូរទៅជា «ការរួមបញ្ចូលគ្នានៃបច្ចេកវិទ្យាកម្រិតខ្ពស់ និងខ្សែសង្វាក់ផ្គត់ផ្គង់រួមគ្នា»។ មន្ទីរបញ្ចកោណ​របស់អាមេរិក និងក្រសួងការពារជាតិអ៊ីស្រាអែល បានសហការគ្នាយ៉ាងជិតស្និទ្ធក្នុងការស្រាវជ្រាវ និងអភិវឌ្ឍប្រព័ន្ធអាវុធទំនើបៗ រាប់​ចាប់ពីប្រព័ន្ធការពារដែនអាកាស រហូតដល់បច្ចេកវិទ្យាបញ្ញាសិប្បនិម្មិត (AI) សម្រាប់វិស័យយោធា ដែលធ្វើឱ្យប្រទេសទាំងពីរកាន់តែពឹងផ្អែកលើគ្នាទៅវិញទៅមក និងមិនអាចកាត់ផ្តាច់បានឡើយ។

៣. សម្ពាធនយោបាយផ្ទៃក្នុង និងក្រុមអ្នកគាំទ្រ

នៅក្នុងប្រព័ន្ធបោះឆ្នោតរបស់អាមេរិក សំឡេង​ឆ្នោត និងប្រភពថវិកាឃោសនា គឺជារឿងសំខាន់បំផុត។ ក្រុមអ្នក​គាំទ្រអ៊ីស្រាអែល ដូចជា អង្គការ AIPAC (American Israel Public Affairs Committee) មានឥទ្ធិពលយ៉ាងខ្លាំង ក្នុងការផ្តល់ជំនួយហិរញ្ញវត្ថុដល់យុទ្ធនាការបោះឆ្នោតរបស់បេក្ខជនទាំងខាងបក្សប្រជាធិបតេយ្យ និងបក្សសាធារណរដ្ឋ។ អ្នកនយោបាយណា ដែលហ៊ានចេញមុខប្រឆាំង ឬរិះគន់អ៊ីស្រាអែល ច្រើនតែត្រូវប្រឈមមុខនឹងការកាត់ផ្តាច់ថវិកា ឬត្រូវប្រឈមនឹងបេក្ខជនផ្សេងទៀតដែលទទួលបានការគាំទ្រផ្នែកហិរញ្ញវត្ថុយ៉ាងក្រាស់ក្រែលពីក្រុមទាំងនេះ។

ម្យ៉ាងវិញទៀត ក្រៅពីសហគមន៍ជ្វីហ្វនៅអាមេរិក គណបក្សសាធារណរដ្ឋ ក៏ទទួលបានការគាំទ្រយ៉ាងខ្លាំងពីក្រុមគ្រិស្តសាសនិកបែប Evangical (Evangelical Christians) រាប់លាននាក់ ដែលជឿជាក់លើផ្នែកសាសនាថា ជនជាតិជ្វីហ្វត្រូវតែមានទឹកដីផ្ទាល់ខ្លួននៅមជ្ឈិមបូព៌ា ដើម្បីបំពេញតាមទំនាយក្នុងគម្ពីរ។ ដូច្នេះ ការគាំទ្រអ៊ីស្រាអែល គឺជាយុទ្ធសាស្ត្រដ៏សំខាន់ ដើម្បីទាញយកសន្លឹកឆ្នោតពីអ្នកបោះឆ្នោតដ៏មានសក្តានុពលទាំងនេះ៕

អត្ថបទ៖ ឈាង