យានយន្តដឹកជញ្ជូនលើសទម្ងន់ ១៩គ្រឿង ត្រូវក្រុមចល័តក្រសួងចុះឆ្មក់ត្រួតពិនិត្យ

គិតចាប់ពីថ្ងៃទី១៨ ឧសភា ដល់ថ្ងៃទី១៨ មិថុនា ឆ្នាំ ២០២៦ ក្រុមជញ្ជីងចល័តក្រសួង​សាធារណការ និងដឹកជញ្ជូន សហការជាមួយជញ្ជីងអចល័តកាំពី ខេត្តក្រចេះ បានចុះត្រួតពិនិត្យយានយន្ត ដឹកជញ្ជូនលើស ទម្ងន់កម្រិតកំណត់ និងពិន័យ សរុបចំនួន ១៩គ្រឿង ដែលលើសទម្ងន់អនុញ្ញាតចន្លោះពី ៥តោន ដល់ ៤៩តោន។ នេះតាមការឲ្យដឹងពីលោក សាំង ប៊ុនថេន ប្រធានមន្ទីរសាធារណៈការ និង​ដឹកជញ្ជូនខេត្តក្រចេះ នៅថ្ងៃទី១៨ ខែមិថុនា ឆ្នាំ២០២៦។

ទន្ទឹមនឹងនោះ ក្រសួងសាធារណការ និងដឹកជញ្ជូន បានក្រើនរម្លឹកដល់ម្ចាស់ក្រុមហ៊ុនដឹកជញ្ជូនធុនធ្ងន់ ម្ចាស់យានយន្តដឹកជញ្ជូនធុនធ្ងន់ និងអ្នកបើកបរយានយន្តធុនធ្ងន់ទាំងអស់ សូមចូលរួម គោរពច្បាប់ និងគោរពតម្រាយផ្លូវអនុញ្ញាតសម្រាប់យានយន្តចាប់ពីភ្លៅ៦ឡើង ដែលក្រសួងបានណែនាំឲ្យបានត្រឹមត្រូវ។ ក្រុមការងារចល័ត នឹងបន្តចុះឆ្មក់ត្រួតពិនិត្យយានយន្តដឹកជញ្ជូនលើសទម្ងន់ កម្រិតកំណត់នៅទូទាំងប្រទេស ដើម្បីទប់ស្កាត់និងចាត់វិធានការរឹតបន្តឹងការអនុវត្តច្បាប់យ៉ាងតឹងរ៉ឹងដោយគ្មានការលើកលែងឡើយ។

ទោះបីជាក្រុមជញ្ជីងចល័តចំរុះ ចុះធ្វើការបង្ក្រាបរថយន្តដឹកលើសទម្ងន់ជាបន្តបន្ទាប់នៅក្នុងភូមិសាស្ត្រនៃខេត្តក្រចេះយ៉ាងណាក្តី ប៉ុន្តែពលរដ្ឋបានលើកឡើងថា សកម្មភាពរថយន្តធុនធំ ប្រភេទ វេអង នៅតែបន្តធ្វើសកម្មភាពដឹកជញ្ជូនជារៀងរាល់យប់៕

អត្ថបទ៖ ប្រុញ វិធិន