មេយោធាខេត្តកំពង់ធំបន្តពង្រឹងភារកិច្ចរបស់កងកម្លាំង ទាំងកិច្ចការពារជាតិ និងការបង្ក្រាបបទល្មើសធនធានធម្មជាតិ

លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅព្រឹកថ្ងៃទី២២ ខែមិថុនា ឆ្នាំ២០២៦នេះ បានដឹកនាំកិច្ចប្រជុំពង្រឹងតួនាទីភារកិច្ចរបស់កងយោធពលខេមរភូមិន្ទ ដោយក្នុងកិច្ចប្រជុំនោះ លោក បានជំរុញឱ្យកម្លាំងយោធាបន្តត្រៀមខ្លួនជានិច្ចសម្រាប់កិច្ចការពារជាតិ និងការចូលរួមបង្ក្រាបបទល្មើសធនធានធម្មជាតិ។

ឧត្តមសេនីយ៍ទោ សោម ស៊ុន បានណែនាំដល់យោធិនគ្រប់រូបត្រូវត្រៀមខ្លួនរួចជាស្រេចក្នុងការអនុវត្តតាមបទបញ្ជារបស់ថ្នាក់ដឹកនាំគ្រប់ជាន់លំដាប់ថ្នាក់ សម្រាប់ភារកិច្ចការពារបូរណភាពទឹកដី និងត្រូវបន្តសកម្មភាពអនុវត្តភារកិច្ចក្នុងការការពារ ទប់ស្កាត់ និងបង្ក្រាបទល្មើសធនធានធម្មជាតិឱ្យមានប្រសិទ្ធភាព ព្រមទាំងត្រូវបន្តចូលរួមសហការជាមួយអាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទក្នុងការអនុវត្តនូវគោលនយោបាយភូមិ ឃុំ សង្កាត់មានសុវត្ថិភាព របស់រាជរដ្ឋាភិបាល។

លោកឧត្តមសេនីយ៍ទោ ក៏ណែនាំឱ្យយោធិនទាំងអស់ ត្រូវត្រៀមលក្ខណៈអន្តរាគមន៍ជួយដោះស្រាយការលំបាករបស់ប្រជាពលរដ្ឋ ដែលរងគ្រោះដោយគ្រោះមហន្តរាយផ្សេងៗឲ្យបានទាន់ពេលវេលា ហើយជាមួយគ្នានេះ គឺត្រូវយកចិត្តទុកដាក់ក្នុងការបន្តសកម្មភាពដោះស្រាយនូវរាល់ការលំបាកផ្សេងៗរបស់អតីតយុទ្ធជន និងនិវត្តជនកម្ពុជា នៅខេត្តកំពង់ធំ។ លោក ក៏បានសង្កត់ធ្ងន់ដល់ការគោរព និងអនុវត្តឱ្យបានម៉ឺងម៉ាត់នូវបទវិន័យ របស់កងយោពលខេមរៈភូមិន្ទ៕