កម្ពុជាជំរុញឱ្យមានការអនុវត្តពេញលេញចំពោះសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ

កម្ពុជាបានអំពាវនាវឱ្យមានការអនុវត្តពេញលេញចំពោះសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដោយចាត់ទុកថា សេចក្ដីសម្រេចរបស់យន្តការនេះគឺមានសារៈសំខាន់ក្នុងការរក្សាសន្តិភាព និងសន្តិសុខពិភពលោក។

ថ្លែងនៅក្នុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិស្ដីពីការបំពេញចន្លោះខ្វះខាតក្នុងការអនុវត្តនូវសេចក្ដីសម្រេចចិត្តរបស់ក្រុមប្រឹក្សាសន្តិសុខ កាលពីថ្ងៃទី២៣ ខែមិថុនា ឆ្នាំ២០២៦ លោក កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បាននិយាយថា សេចក្តីសម្រេចចិត្តរបស់ក្រុមប្រឹក្សាសន្តិសុខដើរតួនាទីយ៉ាងសំខាន់​ក្នុងការទប់ស្កាត់ និងការកាត់បន្ថយភាពតានតឹងនៃជម្លោះ ហើយឈានឆ្ពោះទៅរកការដោះស្រាយជម្លោះ​ដោយសន្តិវិធី។

ក្នុងន័យនេះ លោក សង្កត់ធ្ងន់ថា រដ្ឋសមាជិកទាំងអស់ត្រូវតែអនុវត្តឱ្យបាន​ពេញលេញចំពោះសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ។

ដូចគ្នានឹងសេចក្តីសម្រេចចិត្តរបស់ក្រុមប្រឹក្សាសន្តិសុខ លោក កែវ ឈា បានគូសបញ្ជាក់ពីសារៈសំខាន់នៃច្បាប់អន្តរជាតិ ជាពិសេសសាលដីការបស់តុលាការយុត្តិធម៌អន្តរជាតិ។ លោក បញ្ជាក់ថា សាលដីការបស់តុលាការយុត្តិធម៌អន្តរជាតិដែលមានអនុភាពគតិយុត្តិ​ គឺមិនត្រូវរងការ​រំលោភបំពានបានឡើយ ទោះក្រោមលេស​ណាមួយក៏ដោយ៕