សេដ្ឋកិច្ច

ក្រុមហ៊ុនជម្រះបញ្ជី ធនាគារ ផេនដា កំពុងបំប្លែងទ្រព្យសកម្មដើម្បីទូទាត់បំណុល ខណៈម្ចាស់ប្រាក់បញ្ញើ ៩៦% នឹងទទួលបានការទូទាត់ទាំងស្រុង

បានផុស

៣ សប្តាហ៍ មុន

នៅ

ថ្ងៃសុក្រ ២៦ មិថុនា ២០២៦

ដោយ

ក្រុមហ៊ុនម៉ូរីសុនកាក់ អឹមខេអេ (Morisonkak MKA) ដែលជាអ្នកជម្រះបញ្ជី កំពុងបំប្លែងទ្រព្យសកម្មរបស់ធនាគារ ផេនដា ខមមើសសល ប៊ែង ទៅជាសាច់ប្រាក់ ដើម្បីទូទាត់ជូនម្ចាស់ប្រាក់បញ្ញើ និងបំណុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនម៉ូរីសុនកាក់ បញ្ជាក់ថា ដោយសារការបំប្លែងទ្រព្យសកម្មត្រូវការពេលវេលា ការទូទាត់ប្រាក់បញ្ញើត្រូវបានអនុវត្តជាដំណាក់កាល។ តាមការគ្រោងទុក ម្ចាស់ប្រាក់បញ្ញើប្រមាណ ៩៦% នឹងទទួលបានការទូទាត់ទាំងស្រុង ក្នុងដំណាក់កាលទី១។

បច្ចុប្បន្ននេះ សម្រាប់ដំណាក់កាលទី១ អ្នកជម្រះបញ្ជីកំពុងបន្តបើកប្រាក់ជូនម្ចាស់ប្រាក់បញ្ញើតាមលំដាប់លេខរៀង។ ក្នុងន័យនេះ សូមលើកទឹកចិត្តដល់ម្ចាស់ប្រាក់បញ្ញើដែលមិនទាន់បានមកបើកប្រាក់ក្នុងដំណាក់កាលទី១ ត្រៀមឯកសារ ពាក់ព័ន្ធឱ្យបានគ្រប់គ្រាន់ និងអញ្ជើញមកបើកប្រាក់របស់ខ្លួន។

ដោយឡែក ចំពោះម្ចាស់ប្រាក់បញ្ញើដែលមានទឹកប្រាក់ចាប់ពី ១ ដុល្លារ ដល់ ៥០០ ដុល្លារ សូមអញ្ជើញមកបើកប្រាក់ក្នុងរយៈពេលមិនលើសពី ១ ខែ គិតចាប់ពីថ្ងៃជូនដំណឹងនេះតទៅ។ ការជូនដំណឹងនេះចាត់ទុកជាការរំលឹកលើកទី១ ដល់ម្ចាស់ប្រាក់បញ្ញើពាក់ព័ន្ធដើម្បីអញ្ជើញមក បើកប្រាក់របស់ខ្លួនឱ្យបានទាន់ពេលវេលា។

ចំណែកម្ចាស់ប្រាក់បញ្ញើចំនួន ១៩៨ នាក់ (ម្ចាស់ប្រាក់បញ្ញើដែលមានទឹកប្រាក់ធំ) ដែលមិនទាន់ទូទាត់បាន ទាំងស្រុងនៅឡើយ អ្នកជម្រះបញ្ជីនឹងបន្តទូទាត់នៅដំណាក់កាលបន្ទាប់ ស្របតាមវឌ្ឍនភាព នៃការបំប្លែងទ្រព្យសកម្ម។

ដោយឡែក សម្រាប់ដំណើរការជម្រះបញ្ជី ធនាគារ ព្រីនស៍ ម.ក អ្នកជម្រះបញ្ជីបានទូទាត់ម្ចាស់ប្រាក់បញ្ញើស្ទើរតែទាំងស្រុង លើកលែងតែប្រាក់បញ្ញើដែលត្រូវបានបង្កកដោយស្ថាប័នតុលាការ និងប្រាក់បញ្ញើមានទឹកប្រាក់តូចៗដែលម្ចាស់ប្រាក់បញ្ញើមិនទាន់បានមកទទួល ឬមិនអាចទាក់ទងបាន តែប៉ុណ្ណោះ។

ទន្ទឹមនេះ អ្នកជម្រះបញ្ជីក៏កំពុងបន្តផ្ទេរសិទ្ធិលើឥណទានរបស់អតិថិជននៃធនាគារ ព្រីនស៍ ម.ក ទៅ ធនាគារប្រៃសណីយ៍កម្ពុជា ស្របតាមសេចក្តីជូនដំណឹងចុះថ្ងៃទី១៣ ខែឧសភា ឆ្នាំ២០២៦៕

អត្ថបទ៖ ឡេង ដេត

Related Topics:ធនាគារ PANDA