កីឡា

ម្ចាស់ផ្ទះ កាណាដា បង្កើតប្រវត្តិសាស្ត្រថ្មីឡើងវគ្គ ១៦ ក្រុមលើកដំបូងក្នុង World Cup

បានផុស

៣ នាទី មុន

នៅ

ថ្ងៃចន្ទ ២៩ មិថុនា ២០២៦

ដោយ

ក្រុមបាល់ទាត់ជម្រើសជាតិ កាណាដា បានបង្កើតប្រវត្តិសាស្ត្រក្នុងការឡើងដល់វគ្គ ១៦ ក្រុមចុងក្រោយជាលើកដំបូង ក្នុងព្រឹត្តិការណ៍បាល់ទាត់ពិភពលោក World Cup បន្ទាប់ពីពួកគេធ្វើបានយ៉ាងល្អនៅវគ្គសន្សំពិន្ទុក្នុងពូល និងវគ្គ ៣២ ក្រុមចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅវគ្គសន្សំពិន្ទុ កាណាដា រកបាន ៤ ពិន្ទុ ឈរចំណាត់ថ្នាក់លេខ ២ ក្នុងពូល តាមរយៈលទ្ធផលស្មើគ្នាជាមួយ ប៊ូស្នៀ ១-១, ឈ្នះ កាតា ៦-០ និងចាញ់ ស្វីស ២-១។ នៅវគ្គ ៣២ ក្រុមចុងក្រោយ ពួកគេបានយកឈ្នះ អាហ្វ្រិកខាងត្បូង ដោយលទ្ធផល ១-០ ដែលរកបានគ្រាប់បាល់ដោយកីឡាករ Eustaquio នៅនាទី ៩០+២ ដើម្បីឡើងទៅកាន់វគ្គ ១៦ ក្រុមចុងក្រោយ។

គិតចាប់តាំងពីឆ្នាំ ១៩៥៨ មក កាណាដា ធ្លាប់បានឡើងដល់ជុំចុងក្រោយតែ ៣ ដងប៉ុណ្ណោះគិតទាំង ឆ្នាំ ២០២៦នេះ និងបានធ្លាក់ក្នុងវគ្គជម្រុះ ១៣ ដង។ ការឡើងដល់ជុំចុងក្រោយពីរលើកមុនគឺនៅឆ្នាំ ១៩៨៦ និង ឆ្នាំ ២០២២ ពួកគេបានធ្លាក់ត្រឹមវគ្គសន្សំពិន្ទុក្នុងពូលទាំងពីរលើក។ ទើបតែឆ្នាំ ២០២៦នេះ ពួកគេបានបង្កើតប្រវត្តិសាស្ត្រថ្មី ក្នុងការឆ្លងផុតវគ្គសន្សំពិន្ទុក្នុងពូល ហើយបានបង្កើតប្រវត្តិសាស្ត្រជាថ្មីក្នុងការឆ្លងផុតវគ្គ ៣២ ក្រុមចុងក្រោយ និងឈានដល់វគ្គ ១៦ ក្រុមចុងក្រោយ។

នេះជាមោទនភាពថ្មីសម្រាប់ កាណាដា ដែលបានទទួលរៀបចំធ្វើជាម្ចាស់ផ្ទះហើយ ក្រុមបាល់ទាត់ជម្រើសជាតិរបស់ខ្លួនកំពុងស្ថិតនៅលើផ្លូវដ៏ល្អឆ្ពោះទៅរកការបង្កើតប្រវត្តិសាស្ត្រថ្មីៗបន្ថែមទៀត។