រុស្ស៊ី ចោទថា ណាតូ កំពុងចេញមុខចេញមាត់ ជួយអ៊ុយក្រែន រកអាវុធ យកទៅកម្ទេចគោលដៅយុទ្ធសាស្រ្ត ក្នុងដីខ្លួន

ស្ថានការណ៍ក្នុងតំបន់អឺរ៉ុបភាគខាងកើត នៅតែក្តៅ ដោយសង្គ្រាមរុស្ស៊ី-អ៊ុយក្រែន មិនធូរស្រាលសោះឡើយ ហើយឥឡូវ ទីក្រុងមូស្គូ ថែមទាំងចោទប្រកាន់អង្គការណាតូ ទៀតថា កំពុងចេញមុខចេញមាត់ជួយអ៊ុយក្រែន ក្នុងស្វែងរកអាវុធ ដើម្បីយកទៅកម្ទេចគោលដៅយុទ្ធសាស្រ្ត ដែលស្ថិតនៅជ្រៅក្នុងទឹកដីរបស់ខ្លួន។

ការចោទប្រកាន់នេះ គឺចេញពីមាត់អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ​ សំដៅទៅ កិច្ចសន្យាដេញថ្លៃតម្លៃ ២៨៥ ៦៥៦ ដុល្លារ ដែលត្រូវបានប្រកាសកាលពីពាក់កណ្តាលខែមិថុនា ដោយបញ្ជាការដ្ឋានកែទម្រង់សម្ព័ន្ធមិត្តរបស់ណាតូ (ACT) សហការជាមួយមជ្ឈមណ្ឌលរួមគ្នាសម្រាប់ការវិភាគ បណ្តុះបណ្តាល និងអប់រំរវាងណាតូ និងអ៊ុយក្រែន (JATEC)។

លោកស្រីចោទថា នោះ ជាគម្រោង ដែលផ្តោតសំខាន់ឲ្យបណ្តាសហគ្រាសឯកជន អភិវឌ្ឍ និងផលិតអាវុធ ដើម្បីយកមកប្រើប្រាស់ប្រឆាំងនឹងរុស្ស៊ី។ ដូច្នេះ វានឹងបង្កើនសមត្ថភាពវាយប្រហាររយៈចម្ងាយឆ្ងាយរបស់អ៊ុយក្រែន  ទៅកម្ទេចវាលយន្តហោះ ឃ្លាំងស្តុកប្រេង និងសម្ភារៈគាំទ្រនៅលើដី ចូលជ្រៅក្នុងទឹកដីរុស្ស៊ី។

តាមសម្តីលោកស្រី Zakharova ដែលដកស្រង់ដោយ RT កាលពីថ្ងៃចន្ទ ទី២៩ ខែមិថុនា ឆ្នាំ២០២៦, ​ណាតូកំពុងលូកដៃកាន់តែជ្រៅដោយបើកចំហ ក្នុងតំបន់ដែលមានហានិភ័យខ្ពស់ ដើម្បីប្រែក្លាយអ៊ុយក្រែន ទៅជាទីលានសាកល្បង សម្រាប់បច្ចេកវិទ្យាយោធាថ្មីៗ ទាំងដែលភ្លេចគិតថា រឿងនោះនឹងធ្វើឲ្យពួកគេ ត្រូវប្រឈមមុខដោយផ្ទាល់ ជាមួយទីក្រុងមូស្គូ។

យ៉ាងណា រឿងនេះកើតឡើង ដ្បិតអគ្គលេខាធិការណាតូ លោក Mark Rutte ​បាន​​លើក​ឡើងនា​ពេលថ្មីៗនេះ​ថា សមាជិកជា​ច្រើន មិនបានវិភាជ​​ថវិកា​រដ្ឋ ​​​០.២៥​%​ នៃ​ផលិត​ផល​សរុប​ក្នុង​ស្រុក​​​ ដើម្បី​​ជួយ​អ៊ុយ​ក្រែន​ទេ ហើយ​វា​ក៏​នឹង​មិន​សម្រេច​​ដែរ​ ព្រោះ​គ្មាន​​ការ​គាំទ្រ​ ពី​សមាជិក​ទាំង​អស់​​​។

ទោះបែបនេះ សមាជិកណាតូ​ចំនួន​៧ បានចំណាយលើស​ ០.២៥% នៃ​ផលិតផលក្នុងស្រុក​សរុប​របស់​ពួក​គេរួចហើយ ​លើ​ជំនួយ​យោធា​ដល់​អ៊ុយក្រែន ហើយ​បង្ហាញ​ការ​គាំទ្រ​ចំពោះផែនការនេះ​៕

អត្ថបទ៖ សុវណ្ណ