អ៊ុយក្រែន អនុម័ត​យុទ្ធនាការពិសេស ៤០ថ្ងៃ បង្ខំឱ្យរុស្ស៊ីបញ្ចប់សង្រ្គាម

លោកប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានប្រកាសឱ្យដឹងកាលពីថ្ងៃព្រហស្បតិ៍ ទី​២៥ ខែមិថុនា ឆ្នាំ​២០២៦ ថា លោកបានអនុម័តជាផ្លូវការលើផែនការប្រតិបត្តិការពិសេសរយៈពេល ៤០ថ្ងៃ របស់ទីភ្នាក់ងារសន្តិសុខជាតិអ៊ុយក្រែន ក្នុង​សង្គ្រាម​តទល់​នឹង​រុស្ស៊ី។ នេះ​បើយោងតាម​ការ​ចុះផ្សាយរបស់​សារព័ត៌មាន Kyiv Post។

យុទ្ធនាការទ្រង់ទ្រាយធំនេះ ធ្វើឡើង ក្នុងគោលបំណងបង្កើនសម្ពាធកាន់តែខ្លាំងលើប្រទេសរុស្ស៊ី និងបង្ខំឱ្យរដ្ឋាភិបាលទីក្រុងមូស្គូ យល់ព្រមបញ្ចប់សង្រ្គាមលុកលុយប្រឆាំងនឹងប្រទេសអ៊ុយក្រែន។

ការសម្រេចចិត្តដ៏សំខាន់នេះ ត្រូវបានធ្វើ ក្រោយពេលដែលលោកប្រធានាធិបតី ហ្សេលេនស្គី ទទួលរបាយការណ៍លម្អិតពីលោកឧត្តមសេនីយ៍ទោ Yevhenii Khmara ស្តីពីផែនការវាយប្រហាររយៈចម្ងាយឆ្ងាយ និងមធ្យម ដើម្បីកាត់ផ្តាច់ដង្ហើមសេដ្ឋកិច្ចរុស្ស៊ី ព្រមទាំងលទ្ធផលគួរឱ្យកត់សម្គាល់​នៅ​លើ​សមរភូមិ​របស់​កងកម្លាំងពិសេស «Alpha»។

ការប្រកាសនេះ បានកើតឡើងចំពេលដែលកងទ័ពអ៊ុយក្រែន កំពុងតែពង្រីកវិសាលភាពនៃការវាយប្រហាររយៈចម្ងាយឆ្ងាយទៅលើគោលដៅយុទ្ធសាស្ត្រនានា ទាំងនៅក្នុងទឹកដីរុស្ស៊ីផ្ទាល់ និងនៅក្នុងតំបន់ដែលរុស្ស៊ីកំពុងកាន់កាប់។ ប្រតិបត្តិការភាគច្រើន សំដៅ​លើ​ឧស្សាហកម្មប្រេងកាតរបស់រុស្ស៊ី ដែលជាប្រភពចំណូលដ៏សំខាន់ និងជាបេះដូងភស្តុភារ សម្រាប់ផ្គត់ផ្គង់កងទ័ពរបស់ទីក្រុងមូស្គូនៅក្នុងសង្រ្គាមនេះ។

សូម​ជម្រាប​ថា កន្លង​មក រុស្ស៊ី​តែងតែ​​លើក​ឡើង​ថា ការ​ប្រឹង​បង្កើន​ល្បឿន​វាយ​​ប្រហារ​របស់​អ៊ុយក្រែន គឺ​គ្រាន់តែ​ជា​ការ​ចង់បង្កើតប្រៀប និងស្វែងរកលក្ខខណ្ឌចំណេញសម្រាប់ខ្លួនឯង មុនពេលការចរចាដែលកំពុងជាប់គាំង អាចនឹងត្រូវចាប់ផ្តើមឡើងវិញតែប៉ុណ្ណោះ។ ពាក់ព័ន្ធ​នឹង​រឿង​ចរចា​បញ្ចប់​សង្គ្រាម មេដឹកនាំ​រុស្ស៊ី​ លោក វ៉្លាឌីមៀរ ពូទីន ធ្លាប់​បាន​អះអាង​​កាល​ពី​ថ្ងៃ​ពុធ​កន្លង​ទៅ​ថា ក្រុង​មូស្គូបានត្រៀមខ្លួនរួចជាស្រេចហើយ ក្នុងការបើកកិច្ចចរចាសន្តិភាពជាមួយអ៊ុយក្រែនឡើងវិញ តែ​ត្រូវតែផ្អែកលើកិច្ចព្រមព្រៀង ដែលធ្លាប់ជជែកគ្នានៅទីក្រុងអ៊ីស្តង់ប៊ុល ប្រទេសតួកគី និងការពិភាក្សានៅ​សហរដ្ឋអាមេរិក រួមទាំងត្រូវមើលលើស្ថានការណ៍ជាក់ស្តែងនៅលើសមរភូមិ នាពេលបច្ចុប្បន្នផងដែរ៕

ប្រែសម្រួល៖ ឈាង