កីឡា

ការលេងដោយស្មារតីនឹងធឹងធ្វើឲ្យ ស៊ុយ ខន ក្លាយជាសំណប់ចិត្តរបស់គ្រូឥណ្ឌូណេស៊ី លោក Indra

បានផុស

២៦ វិនាទី មុន

នៅ

ថ្ងៃអង្គារ ៣០ មិថុនា ២០២៦

ដោយ

ម្ចាស់អាវលេខ៩ របស់បញ្ជាការដ្ឋានអង្គរក្ស កីឡាករ ស៊ុយ ខន រូបគេក៏មិនហ៊ានវាយតម្លៃថាខ្លួនឯងល្អណាស់ណាដែរ ការទុកចិត្តរបស់គ្រូឥណ្ឌូណេស៊ី Indra អាចដោយសារខ្លួនមានស្មារតីនឹងធឹងក្នុងការប្រកួតកន្លងទៅទើបមានឱកាសជាប់ជម្រើសរហូតមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ស៊ុយ ខន

កីឡាករ ស៊ុយ ខន បានឲ្យដឹងថា ការជាប់ជម្រើសរបស់លោក Indra និងបានលេងរហូតមកនេះគឺអាស្រ័យលើគ្រូមើលឃើញខ្លួនឯងផ្ទាល់។ ចំពោះសមត្ថភាពខ្លួនល្អយ៉ាងណានោះរូបគេមិនហ៊ានវាយតម្លៃនោះទេតាមការយល់ឃើញរបស់អ្នកគាំទ្រដែលបានទស្សនាការលេងកន្លងមក។

ស្មាត់ដើមកំណើតពីខេត្តតាកែវរូបនេះបន្ថែមទៀតថា ការទុកចិត្តរបស់លោក Indra មកលើខ្លួននេះអាចដោយសារតែការលេងមិនសូវបែកអារម្មណ៍ លេងដោយស្មារតីនឹងធឹងផង បូកជាមួយបច្ចេកទេសផ្ទាល់ខ្លួនដូចជាចេះកែបាល់ខូចផ្សេងៗ និងផ្សំជាមួយសំណាងផង។ តាមរយៈបទពិសោធលើទីលានជាច្រើនឆ្នាំ និងការជួយក្រុមបានច្រើនទើបតែងតែទទួលបានឱកាសពីគ្រូបង្វឹកជនជាតិឥណ្ឌូណេស៊ីឲ្យចូលលេងច្រើនបែបនេះ។

លោក Indra គ្រូបង្វឹកបញ្ជាការដ្ឋានអង្គរក្ស

បញ្ជាក់ដែរថា ស៊ុយ ខន ជាកីឡាករលេចធ្លោមួយរូបប្រចាំក្រុមបញ្ជាការដ្ឋានអង្គរក្សជាច្រើនឆ្នាំមកនេះក្រោមការដឹកនាំដោយលោក Indra ដែលជាជនជាតិឥណ្ឌូណេស៊ី។ រូបគេតែងតែរកបានពិន្ទុក្នុងការប្រកួត និងជួយក្រុមបានច្រើននាពេលកន្លងមក។ គេតែងតែឃើញលោក Indra ពេញចិត្ត និងដាក់ឲ្យកីឡាករ ស៊ុយ ខន លេងស្ទើររាល់ប្រកួតពិសេសអំឡុងការប្រកួតតេជោលីគ រដូវកាលទី៣ ឆ្នាំ២០២៦ ដែលកំពុងដំណើរការនេះ។ រង់ចាំមើលកីឡាករឆ្នើមរូបនេះអាចបន្តជួយក្រុមឲ្យឡើងទៅវគ្គពាក់កណ្ដាលផ្ដាច់ព្រ័ត្របានទេនៅថ្ងៃស្អែកនេះ៕