ទំហំ​ពាណិជ្ជកម្ម​ទ្វេភាគី​កម្ពុជា​-អង់គ្លេស​ សម្រេចបានជាង ​៥០០ ​លានដុល្លារ ​នៅឆមាសទី១ ​ឆ្នាំនេះ​

ការ​ដោះ​ដូរ​ទំនិញទ្វេភាគី​កម្ពុជា-អង់គ្លេស​ សម្រេច​បាន​នូវ​ទំហំ​ទឹក​ប្រាក់​ជាង ​៥០០ ​លានដុល្លារ នៅក្នុង​ឆមាស​ទី១​ ឆ្នាំ២០២៦ ថយចុះ ១,៥% ប្រៀបធៀប​នឹង​រយៈពេល​ដូចគ្នា​កាលពីឆ្នាំមុន។​ ​នេះបើយោងតាមរបាយការណ៍របស់អគ្គនាយកដ្ឋានគយ ​និង​រដ្ឋាករកម្ពុជា ​(GDCE)។

​ទិន្នន័យ​របស់​ GDCE បង្ហាញ​ថា ​គិត​ចាប់​ពី​ខែ​មករា ដល់​ខែ​មិថុនា​ ២០២៦ ​ទំហំ​ពាណិជ្ជ​កម្ម​ទ្វេ​ភាគី​កម្ពុជា-​អង់គ្លេស​សរុប​ចំនួន ៥០៧ លានដុល្លារ ក្នុងនោះ​កម្ពុជា​​នាំ​ទំនិញ​ចេញ​​ទៅ​អង់គ្លេស​មាន​ទំហំទឹក​ប្រាក់ ៤៧៨ លានដុល្លារ ថយចុះ ២,៣% ចំណែក​អង់គ្លេស​នាំចូល​មកវិញ​មាន​តម្លៃ ២៩ លានដុល្លារ កើន ១៣,៧%។​

​អ្នកឧកញ៉ា ​លឹម ​ហេង ​អនុប្រធានសភាពាណិជ្ជកម្មកម្ពុជា ​មានប្រសាសន៍ថា ​ទំហំពាណិជ្ជកម្ម​របស់​កម្ពុជាអាស្រ័យ​ទៅលើទីផ្សារ​ដែលយើងមានស្រាប់ ​ដែលមាន EBA នឹង​កិច្ចព្រមពៀងផ្សេងៗ​ ជា​មួយ​កូរ៉េ ចិន ​អង់គ្លេស​ ដែល​នឹងធ្វើឱ្យពាណិជ្ជកម្មមានកំណើននៅពេលខាងមុខ។ ​

​លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ​កម្ពុជា និង​ចក្រភពអង់​គ្លេស​មាន​ទំនាក់ទំនងជិតស្និទ្ធលើគ្រប់វិស័យ ជាពិសេសក្នុងវិស័យពាណិជ្ជកម្ម និងវិនិយោគ។ ​

​នៅ​ក្នុងឆ្នាំ​ ២០២៥ ​ទំហំពាណិជ្ជកម្មទ្វេភាគីកម្ពុជា-អង់គ្លេស ​មានតម្លៃ សរុបប្រមាណជាង ១,០៦ ពាន់លានដុល្លារ កើនឡើង ៥,៧% ធៀបនឹងឆ្នាំ ២០២៤ ក្នុងនោះកម្ពុជា​នាំចេញ​ទៅអង់​គ្លេសមាន​ទំហំ​ ១,០១ ​ពាន់​លានដុល្លារ ​ចំណែកអង់គ្លេសនាំមកវិញមានតម្លៃ ៥៤ កើនឡើង ២,២% ចុះជាង ២%៕​

​អត្ថបទ៖ ឡេង ដេត