កីឡា

គុណភាពពិត! Rui Pires របស់ ព្រះខ័នរាជស្វាយរៀង ធ្លាប់ជាប្រធានក្រុមយុវជនព័រទុយហ្គាល់ មានបទពិសោធច្រើននៅអឺរ៉ុប

បានផុស

៤១ វិនាទី មុន

នៅ

ថ្ងៃអង្គារ ១៤ កក្កដា ២០២៦

ដោយ

អតីតប្រធានយុវជនជម្រើសជាតិព័រទុយហ្គាល់ Rui Pires បានចូលរួមជាមួយក្លិបបាល់ទាត់ ព្រះខ័នរាជស្វាយរៀង កាលពីថ្ងៃទី១១ ខែកក្កដា ឆ្នាំ ២០២៦ ដើម្បីត្រៀមប្រជែងពានរង្វាន់ក្នុងស្រុក និងអន្តរជាតិសម្រាប់រដូវកាលថ្មី ២០២៦-២៧។

កីឡាករ Rui Pires ពាក់អាវព្រះខ័នរាជស្វាយរៀង

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Rui Pires អាយុ ២៨ ឆ្នាំ កម្ពស់ ១.៨២ ម៉ែត្រ លេងតួនាទីជាខ្សែបម្រើការពារដែលមានបទពិសោធច្រើនទាំងនៅតំបន់អឺរ៉ុប និងអាស៊ី មុនពេលចូលរួមជាមួយក្លិបជើងឯកលីគកំពូលកម្ពុជា។ កីឡាករជាយុវជនរបស់ក្លិប FC Porto ដែលជាក្លិបលំដាប់កំពូលនៅប្រទេសព័រទុយហ្គាល់ ដែលរូបគេបានចំណាយពេលអភិវឌ្ឍខ្លួនរយៈពេល ៦ ឆ្នាំគិតចាប់ពីឆ្នាំ ២០០៩ ដល់ ឆ្នាំ ២០១៥។

នៅឆ្នាំ ២០១៦ រូបគេត្រូវបានតម្លើងមកចូលរួមជាមួយក្រុមធំជម្រើសដៃទី ២ របស់ក្លិប FC Porto ដោយបង្ហាញខ្លួនបានចំនួន ៦៩ ប្រកួត រហូតដល់ឆ្នាំ ២០១៩ ទើបបានផ្លាស់ទៅចូលរួមជាមួយក្លិបបារាំង Troyes ស្ថិតក្របខណ្ឌលីគលំដាប់ទី ២។ នៅក្លិបថ្មីនេះ រូបគេបង្ហាញខ្លួនលើទីលានបាន ៣២ ប្រកួត មុនពេលផ្លាស់ទៅក្លិប Pacos de Perreira ក្នុងក្របខណ្ឌលីគទី ២ របស់ ព័រទុយហ្គាល់ជាកន្លែង ដែលរូបគេចំណាយពេលពីឆ្នាំ ២០២១ ដល់ ២០២៣ ដោយបង្ហាញខ្លួនលើទីលាន ៥២ ប្រកួត។

កីឡាករ Rui Pires លេខ ៦ ធ្លាប់ជាប្រធានក្រុម U19 ព័រទុយហ្គាល់

បន្ទាប់មក ខ្សែបម្រើការពារ Rui Pires បានចាកចេញពីតំបន់អឺរ៉ុបមកបន្តអាជីពនៅតំបន់អាស៊ីដោយបានចូលរួមជាមួយក្លិបធំរបស់សិង្ហបុរី Lion City Sailors ពីឆ្នាំ ២០២៣ ដល់ ពាក់កណ្តាលឆ្នាំ ២០២៦។ នៅក្លិបថ្មីនេះ កីឡាករបានជួយក្លិបឈ្នះជើងឯកលីគកំពូលសិង្ហបុរី រដូវកាល ២០២៤-២៥, ឈ្នះពាន Singapore Cup ៣ លើកជាប់គ្នាគឺឆ្នាំ ២០២៣, ២០២៤-២៥ និង ២០២៥-២៦។ ជាពិសេស រូបគេបានជួយក្លិបទទួលបានចំណាត់ថ្នាក់លេខ ២ ពានរង្វាន់អាស៊ីលំដាប់ទី២ AFC Champions League Two រដូវកាល ២០២៤-២៥។

បើនិយាយពីជម្រើសជាតិព័រទុយហ្គាល់វិញ កីឡាករ Rui Pires បានជាប់តាំងពីកម្រិតអាយុ ១៨ ឆ្នាំ រហូតដល់ កម្រិត ២០ ឆ្នាំ ចន្លោះពីឆ្នាំ ២០១៥ ដល់ ឆ្នាំ ២០១៨។ រូបគេជាប្រធានក្រុម និងធ្លាប់បានលេងពានរង្វាន់អន្តរជាតិជាប្រចាំតំបន់អឺរ៉ុប ហើយក៏ធ្លាប់តទល់នឹង សាធារណរដ្ឋឆេក ហូឡង់ ស្វីស ប៉ូឡូញ អាល្លឺម៉ង់ អង់គ្លេស អ៊ីតាលី ដាណឺម៉ាក់ និងក្រូអាត ជាដើម។ រូបគេក៏ជាប់ឈ្មោះនៅក្នុងក្រុមល្អប្រចាំព្រឹត្តិការណ៍ជើងឯកយុវជនទ្វីបអឺរ៉ុបអាយុ ១៩ ឆ្នាំ កាលពីឆ្នាំ ២០១៧ នៅពេលក្រុម U19 ព័រទុយហ្គាល់ ទទួលបានរងជើងឯក ក្រោយចាញ់ ក្រុមយុវជនអង់គ្លេស ១-២។

កីឡាករ Rui Pires (លេខ៦) លេងទល់នឹងអង់គ្លេស

ដោយផ្អែកលើកាយសម្បទា និងបទពិសោធច្រើននៅតំបន់អឺរ៉ុប កីឡាករ Rui Pires នឹងក្លាយជាតួដ៏សំខាន់ម្នាក់នៅតំបន់ការពាររបស់ ក្លិបព្រះខ័នរាជស្វាយរៀង ដែលចាប់ដៃជាមួយខ្សែការពារ Faris Hammouti និង Takashi Odawara ព្រមទាំងកីឡាករកម្ពុជា សឿយ វិសាល និង សារ៉េត គ្រីយ៉ា៕