ថៅកែលក់ម៉ូតូ និងរថយន្ត នៅខណ្ឌច្បារអំពៅ សង្ស័យឆ្លងកូវីដ-១៩ ពីភ្ញៀវ និងមានអ្នកពាក់ព័ន្ធច្រើនទៀត

ភ្នំពេញ៖ ថៅកែលក់ម៉ូតូ និងរថយន្តដែលមានទីតាំងស្ថិតនៅក្បែអធិការដ្ឋាននគរបាលខណ្ឌច្បារអំពៅផ្ទះលេខ១៣៩ ផ្លូវ៦២៨ ភូមិព្រែក សង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ បានឆ្លងជំងឺកូវីដ-១៩ ទាំងប្រពន្ធ និងកូនស្រីសង្ស័យឆ្លងតាមភ្ញៀវមកទិញលក់ម៉ូតូ និងរថយន្ត និងមានអ្នកពាក់ព័ន្ធច្រើនទៀត។

យោងតាមសេចក្តីរាយការណ៍ពីលោក ពៅ ហួត ចៅ សង្កាត់ច្បារអំពៅទី១បានឲ្យ កម្ពុជាថ្មី ដឹងនៅព្រឹកថ្ងៃទី៧ ខែមិថុនានេះថា ថៅកែលក់ម៉ូតូ និងរថយន្ត ឈ្មោះ ម៉ៅ ស៊ាងលីម ពិតជាឆ្លងជំងឺកូវីដ-១៩ ទាំងប្រពន្ធ និងកូនក្រមុំប្រាកដមែនហើយពេលនេះកំពុងសម្រាកពេទ្យ។

លោក ពៅ ហួត បានបញ្ជាក់ថា ថ្មីៗនេះប្រជាពលរដ្ឋនាំគ្នានិយាយតៗគ្នាថា ថៅកែរូបនេះបានស្លាប់ហើយ ប៉ុន្តែធាតុពិតគាត់មិនអីទេ។ ចំពោះអ្នកពាក់ពន្ធ័នឹងថៅកែលក់ និងទិញរថយន្ត ម៉ូតូខាងលើគឺអាចមានច្រើន ដូចជាអតិថិជនមកទិញលក់ម៉ូតូរថយន្ត ពិសេសបុគ្គលិកផ្នែកធនាគារដែលមកទូទាត់ប្រាក់កម្ចីដែលអតិថិជនមកបង់រំលោះជាដើម។ ក្នុងនោះនៅទីតាំងឃ្លាំងរថយន្តមានបើកលក់ភេសជ្ជៈដែលមានភ្ញៀវជាច្រើនចូលពិសារយ៉ាងកុះករ។

លោកបានសំណូមពរអ្នកពាក់ព័ន្ធនឹងថៅកែខាងលើ បើមានអាការៈមិនស្រួលសូមរួសរាន់ទៅពិនិត្យសំណាកឲ្យបានលឿនបំផុតចៀសវាងធ្ងន់ធ្ងរមិនអាចជួយសង្រ្គោះបានឡើយ៕

អត្ថបទ៖ នរា