ធ្វើសំណាកលើអ្នកសង្ស័យចំនួន៣២១នាក់ រកឃើញវិជ្ជមាន១០នាក់

រដ្ឋបាលខេត្តរតនគិរី បានចេញសេចក្តីប្រកាសព័ត៌មានបញ្ជាក់ពីការរកឃើញអ្នកឆ្លងជំងឺកូវីដ១៩ ចំនួន១០នាក់បន្ថែមទៀត នៅថ្ងៃទី១៥ ខែកក្កដា ឆ្នាំ២០២១។

ក្រុមការងារឆ្លើយតបបន្ទាន់មន្ទីរសុខាភិបាល នៃរដ្ឋបាលខេត្តរតនគិរី បានខិតខំបន្តស្រាវជ្រាវ ស្វែងរកអ្នកពាក់ព័ន្ធជាមួយអ្នកវិជ្ជមានជំងឺកូវីដ១៩ កន្លងមក និងបានធ្វើតេស្តមនុស្សសរុប ៣២១នាក់ រកឃើញករណីវិជ្ជមានជំងឺកូវីដ១៩ ចំនួន១០នាក់។

អ្នកវិជ្ជមានខាងលើធ្លាប់បានប៉ះពាល់ផ្ទាល់ជាមួយអ្នកវិជ្ជមានដែលបានរកឃើញកន្លងមក ដោយតម្រូវឲ្យបុគ្គលទាំងនោះធ្វើចត្តាឡីស័ក និងធ្វើតេស្តសំណាកដោយមានអាការៈមិនស្រួលខ្លួន បានស្ម័គ្រចិត្តធ្វើតេស្តសំណាក(Rapid Test) និងមួយចំនួនជាពលរដ្ឋធ្វើដំណើរមកពីខេត្តដទៃ ត្រូវបានក្រុមការងារប្រចាំការនៅតាមគោលដៅត្រួតពិនិត្យបឋមបានរកឃើញ។

ជាលទ្ធផលថ្ងៃនេះ ក្នុងចំណោមអ្នកធ្វើតេស្តសំណាក ៣២១នាក់ រកឃើញវិជ្ជមានកូវីដ19 ចំនួន ១០នាក់។ បច្ចុប្បន្នអ្នកវិជ្ជមានខាងលើត្រូវបានបញ្ជូនទៅព្យាបាលនៅមណ្ឌលព្យាបាលវិទ្យាល័យត្រពាំងក្រហម ស្រុកកូនមុំ និងវិទ្យាល័យហ៊ុនសែនភូមិថ្មី ក្រុងបានលុង ខេត្តរតនគិរី៕

អត្ថបទ ៖ វុទ្ធឦសាន