មន្ទីរពេទ្យ រ៉ូយ៉ាល់ភ្នំពេញ មិនទាន់មាន វ៉ាក់សាំងកូវីដ១៩ Pfizer & Moderna សម្រាប់ចាក់ជូនពលរដ្ឋទេ

មន្ទីរពេទ្យរ៉ូយ៉ាល់ភ្នំពេញ នៅថ្ងៃទី ១៧ ខែសីហា ឆ្នាំ ២០២១ បានបញ្ជាក់ប្រាប់ថា ខ្លួនមិនទាន់មាន វ៉ាក់សាំងកូវីដ១៩ Pfizer & Moderna សម្រាប់លក់ និងចាក់ជូនប្រជាពលរដ្ឋនៅឡើយទេ។

សេចក្ដីជូនដំណឹងរបស់មន្ទីរពេទ្យរ៉ូយ៉ាល់ភ្នំពេញ ចេញផ្សាយកាលពីថ្ងៃទី ១៧ ខែសីហានេះ បញ្ជាក់ថា មន្ទីរពេទ្យក៏ពុំទាន់មានព័ត៌មានជាក់លាក់ណាមួយដែលថា មន្ទីរពេទ្យ និងអាចបញ្ជាទិញវ៉ាក់សាំងបាននៅពេល​ណានោះដែរ។

ក្រសួងសុខាភិបាលបានអនុញ្ញាតឱ្យមន្ទីរពេទ្យរ៉ូយ៉ាល់ភ្នំពេញ មានសិទ្ធបញ្ជាទិញវ៉ាក់សាំងកូវីដ១៩ មកចាក់ជាឯកជនចាក់ជូនប្រជាពលរដ្ឋ ដោយត្រូវបង់ប្រាក់។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាប្រាប់កម្ពុជាថ្មីថា ការនាំចូលវ៉ាក់សាំងកូវីដ១៩ របស់វិស័យឯកជន នឹងចាប់ផ្ដើមឆាប់ៗខាងមុខនេះ ហើយវា​នឹងអាចជួយសម្រាលបន្ទុករបស់រាជរដ្ឋាភិបាល កាត់បន្ថយការឆ្លងរីករាលដាលនៃជំងឺកូវីដ១៩ ព្រមទាំងជួយ​ទ្រទ្រង់ថវិការរបស់រដ្ឋាភិបាល ដែលមិនបាច់ចំណាយលើបុគ្គលមានធនធានធូរធារអាចទៅរក​សេវា​ចាក់ដោយបង់ប្រាក់។

លោកបង្ហើបថា មន្ទីរពេទ្យរ៉ូយ៉ាល់ភ្នំពេញ កំពុងតែព្យាយាមនាំចូលវ៉ាក់សាំង Pfizer & Moderna ហើយលោកសង្ឃឹមថា នឹងអាចនាំចូលមកដល់ឆាប់ៗនេះ ព្រមទាំងអាចនាំចូលបានមុនគេផងដែរ។

ក្រសួងសុខាភិបាលបានសម្រេចអនុញ្ញាតឱ្យវិស័យឯកជនអាចធ្វើការស្នើសុំនាំចូលវ៉ាក់សាំងកូវីដ-១៩ ដែលទទួលស្គាល់ដោយអង្គការសុខភាពពិភពលោក ដើម្បីផ្ដល់សេវាសុខាភិបាលឱ្យកាន់តែទូលំទូលាយ ទប់ស្កាត់ការឆ្លងរាលដាលជំងឺកូវីដ-១៩។

រដ្ឋមន្ត្រីក្រសួងសុខាភិបាល លោក ម៉ម ប៊ុនហេង លើកឡើងថា វ៉ាក់សាំងកូវីដ-១៩​ ដែលអនុញ្ញាតឱ្យនាំចូលនោះគឺវ៉ាក់សាំង ដែលត្រូវបានទទួលស្គាល់​ដោយអង្គការសុខភាពពិភពលោក​ដោយក្រុមហ៊ុនឯកជនត្រូវប្រតិបត្តិការឱ្យបានត្រឹមត្រូវតាមស្តង់ដារបច្ចេកទេសក្នុងការដឹកជញ្ជូន ការថែរក្សា និងការស្តុកវ៉ាក់សាំង​កូវីដ-១៩ នៅក្នុងឃ្លាំងដើម្បីធានាសុវត្ថិភាព និងប្រសិទ្ធិភាពខ្ពស់។

រហូតមកដល់ពេលនេះមានក្រុមហ៊ុនឯកជនប្រមាណជា ១០ ក្រុមហ៊ុន ដែលបានចុះបញ្ជីដាក់ពាក្យស្នើសុំនាំចូលវ៉ាក់សាំងបង្ការជំងឺកូវីដ១៩៕