កីឡា

លីប្រូ អ៊ុន សុវណ្ណារាជ ក្មេងទេសមត្ថភាពលេចធ្លោចាប់ផ្ដើមជំនួសរៀមច្បងបណ្ដើរៗហើយ

បានផុស

១៥ វិនាទី មុន

នៅ

ថ្ងៃចន្ទ ១៣ កក្កដា ២០២៦

ដោយ

កីឡាករលីប្រូរបស់សមាគមបាល់ទះវិសាខា អ៊ុន សុវណ្ណារាជ មួយរយៈពេលចុងក្រោយនេះមានសមត្ថភាពលេចធ្លោខ្លាំងរហូតទទួលបានការមើលឃើញ និងសរសើរពីសហព័ន្ធទៀតផងស្របពេលចាប់ផ្ដើមជំនួសតួនាទីរៀចម្បងបណ្ដើរៗហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ អ៊ុន សុវណ្ណារាជ

យុវជនរបស់សមាគមបាល់ទះវិសាខា អ៊ុន សុវណ្ណារាជ ម្នាក់នេះបានបំពេញតួនាទីច្រើន និងធ្វើបានល្អមែនទែនក្នុងការប្រកួតតេជោលីគ រដូវកាលទី៣ ដែលទើបបញ្ចប់ទៅនេះ។ បើទោះជារូបគេមានអាយុតិច និងទើបមានបទពិសោធយ៉ាងណាក្ដី ប៉ុន្តែទម្រង់លេង និងភាពអស្ចារ្យរបស់គេពិសេសការទទួលសេវាធ្ងន់ៗរបស់ដៃគូបានធ្វើឲ្យថ្នាក់ដឹកនាំសហព័ន្ធមើលឃើញពីភាពរីកចម្រើន។

អ៊ុន សុវណ្ណារាជ និងក្រុមវិសាខា

បន្ទាប់ពីបានលេងជំនួសរៀមច្បង សេង គឹមហាប់ ជាច្រើនប្រកួតនៅតេជោលីគ រដូវកាលទី៣ នេះកីឡាករ អ៊ុន សុវណ្ណារាជ ឥលូវនេះបានជាប់ការជ្រើសរើសជាមួយក្រុមជម្រើសជាតិដើម្បីប្រកួត Sea V Cup លើកទី៦ ចាប់ពីថ្ងៃទី១៥ ដល់ ១៩ ខែកក្កដា ឆ្នាំ២០២៦ ជើងទី១ នៅឯប្រទេសហ្វីលីពីនទៀតផង។ ការប្រកួតឲ្យក្រុមជម្រើសជាតិលើកនេះគឺរូបគេជាប់ជាកីឡាករលីប្រូជាមួយរៀមច្បងគឺកីឡាករ ខឹម សុវណ្ណដារ៉ា។

ក្រុមជម្រើសជាតិបាល់ទះកម្ពុជា

បញ្ជាក់ដែរថា កាលពីរសៀលថ្ងៃទី១១ ខែកក្កដា ឆ្នាំ២០២៦ កន្លងទៅនេះសហព័ន្ធកីឡាបាល់ទះកម្ពុជាបានបញ្ចេញបញ្ជីឈ្មោះកីឡាករជម្រើសជាតិ និងបានធ្វើដំណើរទៅប្រទេសហ្វីលីពីនហើយដើម្បីត្រៀមការប្រកួតជម្រុះក្នុងពូល A នៃ Sea V Cup។ បញ្ជីឈ្មោះកីឡាករលើកនេះគេឃើញមានកីឡាករថ្មី-ចាស់ និងយុវជនច្រើនផងដែរ។ ការប្រកួតដំបូងរបស់កម្ពុជាត្រូវប៉ះម្ចាស់ផ្ទះហ្វីលីពីន ថ្ងៃទី១៥ ខែកក្កដា និងប្រកួតទី២ ប៉ះ ឥណ្ឌូណេស៊ី ថ្ងៃទី១៦ ខែកក្កដា ឆ្នាំ២០២៦៕