ព័ត៌មានជាតិ

ស្រូវវស្សាជាច្រើនហិកតានៅស្រុកក្រឡាញ់ បានក្រៀមស្វិត និងប្រឈមងាប់ដោយសារអត់ទឹក

បានផុស

៥ years មុន

នៅ

ថ្ងៃសុក្រ ២០ សីហា ២០២១

ដោយ

ស្រូវវស្សាជាច្រើនហិកតា នៅក្នុងស្រុកក្រឡាញ់ ខេត្ដសៀមរាប បានក្រៀមស្វិត និងប្រឈមងាប់ ខណៈដែលស្រូវនោះ ខ្វះទឹកភ្លៀងស្រោចស្រប់ និងមិនមានប្រភពទឹកបញ្ចូលស្រែ។

កសិករមួយរូបនៅភូមិគោកល្ហុង ឃុំស្រណាល ស្រុកក្រឡាញ់ លោក រា រិ បានអោយដឹងនៅថ្ងៃទី១៩ ខែសីហានេះថា ស្រូវវស្សារបស់លោកមានជាង២ហិកតា ហើយបានក្រៀមស្វិតរយៈពេលជាច្រើនថ្ងៃមកហើយ ដោយសារអត់ទឹកភ្លៀង ខណៈដែលនៅតំបន់នោះក៏គ្មានប្រភពទឹកប្រឡាយបញ្ចូលស្រែដើម្បីសង្គ្រោះជីវិតស្រូវនោះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្ដថា ស្រូវដែលក្រៀមស្វិតនេះ អាចនឹងងាប់ក្នុងរយៈពេលខ្លីខាងមុខ បើសិនគ្មានភ្លៀងធ្លាក់ទេនោះ។ ការបាត់បង់ស្រូវស្រែនេះ នឹងធ្វើអោយប្រជាកសិករជួបការលំបាក ខណៈដែលជំងឺកូវីដ១៩កំពុងយាយីសុខភាពប្រជាពលរដ្ឋផងដែរ ហើយកាន់តែធ្វើអោយប្រជាពលរដ្ឋនៅតំបន់នោះធ្វើចំណាកស្រុកបន្ថែមទៀត។

លោកថា ស្រូវវស្សាប្រជាកសិករ កាលពីឆ្នាំមុនមិនមានក្រៀមស្វិតដូចឆ្នាំនេះនោះទេ ដោយគ្រាន់តែរាំងស្ងួតរយៈពេលខ្លីប៉ុណ្ណោះ ដែលផ្ទុយពីឆ្នាំ២០២១នេះ មានគ្រោះរាំងស្ងួតរយៈពេល២ខែមកហើយ។

លោក ឡុក វួន មេឃុំស្រណាល ស្រុកក្រឡាញ់ លោកមានប្រសាសន៍ថា ស្រូវវស្សាដែលកំពុងក្រៀមស្វិតនៅឃុំរបស់លោកមានប្រមាណពី១៥០០ហិកតា ទៅ២ពាន់ហិកតា ។ លោកថា គ្រោះរាំងស្ងួតខ្លាំងដែលធ្វើអោយស្រូវស្វិតស្រពោននោះ ចាប់ពីចុងខែកក្កដាកន្លងមកនេះ ។

លោកបន្ថែមថា នៅតំបន់នោះប្រជាកសិករធ្វើស្រែរំពឹងលើទឹកភ្លៀង ហើយបើគ្មានភ្លៀងធ្លាក់ទេគឺស្រូវនោះ មានតែងាប់ប៉ុណ្ណោះ ព្រោះគ្មានប្រភពទឹកដែលអាចនាំបញ្ចូលស្រែកសិករបានឡើយ។

លោកស្រី ម៉ននី រង្សី អភិបាលនៃគណៈអភិបាលស្រុកក្រឡាញ់ មានប្រសាសន៍ថា ផល់ប៉ះពាល់ស្រូវដែលជួបគ្រោះរាំងស្ងួតនោះ មានចំនួន៣ឃុំ ស្មើនឹង១៤ភូមិ ប៉ុន្ដែនៅ ស្រូវនោះមិនខូចធ្ងន់ធ្ងរនោះទេ ដោយបណ្ដូលកណ្ដាលរបស់វានៅពណ៌ខៀវនៅឡើយទេ ជារួមស្រូវនេះវាកំពុងលូតលាស់។

លោកស្រីថា ស្រូវស្រពោននេះ បើក្នុងរយៈពេល១៥ថ្ងៃមិនមានភ្លៀងធ្លាក់ទេ វាអាចខូចខាតទាំងស្រុង ប៉ុន្ដែលោកស្រីថាមានតែជិត១ពាន់ហិកតាប៉ុណ្ណោះ៕

អត្ថបទ ៖ គឿនវេត