រដ្ឋធានីអ៊ីរ៉ង់ អាចនឹងអស់ទឹកស្អាតប្រើប្រាស់ក្នុងរយៈពេលពីរសប្តាហ៍ទៀត

យោងតាមការចេញផ្សាយរបស់សារព័ត៌មាន Al Jazeera នៅថ្ងៃ០៣ខែវិច្ឆិកា ទីក្រុងតេហេរ៉ង់ ដែលជារដ្ឋធានីរបស់ប្រទេសអ៊ីរ៉ង់ កំពុងប្រឈមមុខនឹងវិបត្តិទឹកធ្ងន់ធ្ងរ ខណៈប្រភពទឹកសំខាន់របស់ខ្លួនជិតរីងស្ងួត។

បើតាមមន្រ្តីអ៊ីរ៉ង់ ទីក្រុងនេះអាចអស់ទឹកស្អាតប្រើប្រាស់ក្នុងរយៈពេលពីរសប្តាហ៍ ដោយសារតែគ្រោះរាំងស្ងួតធ្ងន់ធ្ងរ។ទំនប់Amir Kabir ដែលផ្គត់ផ្គង់ទឹកភាគច្រើនរបស់ទីក្រុងតេហេរ៉ង់ ឥឡូវនេះអាចផ្ទុកទឹកបានត្រឹមតែ១៤ លានម៉ែត្រគូប ដែលស្មើនឹង ៨% នៃសមត្ថភាពរបស់វាប៉ុណ្ណោះ។ ដោយសារតែការខ្វះទឹកភ្លៀង ទើបឆ្នាំកង្វះទឹកធ្ងន់ធ្ងរ។

កង្វះខាតទឹកនឹងប៉ះពាល់ធ្ងន់ធ្ងរ ខណៈទីក្រុងតេហេរ៉ង់ មានប្រជាជនជាង ១០ លាននាក់ ប្រើប្រាស់ទឹកប្រហែលបីលានម៉ែត្រគូបជារៀងរាល់ថ្ងៃឯណោះ។ សង្កាត់មួយចំនួននៅពេលនេះបានប្រឈមមុខនឹងការកាត់ផ្តាច់ទឹករួចហើយ។

លើសពីនេះសីតុណ្ហភាពនៅទីក្រុងតេហេរ៉ង់ថ្មីៗនេះបានឡើងដល់ជាង៤០C និងជាង៥០°C នៅតំបន់ភាគខាងត្បូងមួយចំនួន។ រដ្ឋាភិបាលប្រទេសអ៊ីរ៉ង់ថែមទាំងបានប្រកាសថ្ងៃឈប់សម្រាកសាធារណៈដើម្បីសន្សំសំចៃទឹក និងថាមពលទៀតផង។

លោកប្រធានាធិបតី Masoud Pezeshkian បានព្រមានថា ស្ថានភាពទឹកគឺ «ធ្ងន់ធ្ងរជាងអ្វីដែលមនុស្សគិត»។ ចំណែកអ្នកជំនាញបានស្តីបន្ទោសវិបត្តិនេះទៅលើការគ្រប់គ្រងទឹកមិនបានល្អ ការប្រើប្រាស់ទឹកក្រោមដីច្រើនពេក និងការប្រែប្រួលអាកាសធាតុ។

ប្រទេសជិតខាងរបស់អ៊ីរ៉ង់ គឺប្រទេសអ៊ីរ៉ាក់ ក៏កំពុងរងទុក្ខវេទនាដោយសារជួបគ្រោះរាំងស្ងួតបំផុតមិនធ្លាប់មានចាប់តាំងពីឆ្នាំ ១៩៩៣មកផងដែរ៕

អត្ថបទ៖ ប៊ុន សុភាព