ព័ត៌មានជាតិ

រកឃើញអ្នកឆ្លងកូវីដពាក់ព័ន្ធផ្សារKRD ស្រុកកំរៀង កើនឡើងជិត៥០០នាក់ហើយ

បានផុស

៥ years មុន

នៅ

ថ្ងៃចន្ទ ២០ កញ្ញា ២០២១

ដោយ

ប៉ុន្មានថ្ងៃចុងក្រោយនេះ អាជ្ញាធរស្រុកកំរៀង បានអោយដឹងថា តួលេខអ្នកឆ្លងជំងឺកូវីដ-១៩ ពាក់ព័ន្ធនឹងផ្សារ ខេ អ ឌី (KRD) ស្រុកកំរៀង បានកើនឡើងដល់ជិត៥០០នាក់ហើយ ខណៈដែលអាជ្ញាធរ និងមន្ត្រីសុខាភិបាលកំពុងតែបន្តយកសំណាកលើអ្នកភូមិ និងអាជីវករពាក់ព័ន្ធបន្ថែមទៀត។

យោងតាមរបាយការណ៍របស់រដ្ឋបាលស្រុកកំរៀងអោយដឹងថា តួលេខអ្នកពាក់ព័ន្ធនឹងផ្សារខេអឌី មានអ្នកឆ្លងកើនឡើងដល់៤៩៨នាក់ ក្នុងនោះ ស្ត្រីមានចំនួន២៧៧នាក់ ក្នុងចំណោមអ្នកមកយកសំណាកចំនួន១៤៨៩ នាក់ ស្ត្រី៧៨១នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ គឹមខុន អភិបាលស្រុកកំរៀង បានអំពាវនាវអោយប្រជាពលរដ្ឋ និងអាជីវករទាំងអស់ដែលពាក់ព័ន្ធត្រូវនាំគ្នាមកយកសំណាកអោយបានលឿន និងគ្រប់គ្នាដើម្បីកុំអោយឆ្លងចូលសហគមន៍កាន់តែច្រើនថែមទៀត ។

លោក សុខ គឹមខុន បានបន្ថែមថា មូលហេតុដែលមានការផ្ទុះជំងឺកូវីដ១៩ ក្នុងផ្សារKRD ក្នុងភូមិអូដារលើ ឃុំបឹងរាំង ស្រុកកំរៀង និងរាលដាលដល់ភូមិទាំងមូលនេះ ដោយសារតែប្រជាពលរដ្ឋម្នាក់បានចូលទៅ ទិញទំនិញនៅទឹកដីថៃ យកមកលក់នៅផ្សារKRD នេះ រហូតដល់ថ្ងៃទី០៧ ខែកញ្ញា គាត់មានអាការៈខុស ធម្មតា ក៏ពិនិត្យសំណាកឃើញមានកូវីដ-១៩ និងក្រោយមករកឃើញប្រជាពលរដ្ឋម្នាក់ទៀតដែលទៅទិញទំនិញនៅផ្សារថៃដែរមានវិជ្ជមានកូវីដ-១៩ ដែរ ។

ដោយឃើញដូច្នេះ អាជ្ញាធរ និងមន្ត្រីសុខាភិបាលចាប់ផ្តើមពិនិត្យសំណាកលើប្រជាពលរដ្ឋ និងអាជីវករដែលចេញចូលទៅទិញទំនិញនៅផ្សារថៃយកមកលក់នៅផ្សារKRD នេះ ទើបឃើញជាបន្តបន្ទាប់កាន់តែច្រើនឡើង រហូតដល់បិទខ្ទប់ភ្លាមៗនៅទីតាំងផ្សារនេះ និងបន្តបិទភូមិអូរដាលើ ទាំងមូលតែម្តង រហូតដល់មានការជូនដំណឹងជាថ្មី ដើម្បីទប់ស្កាត់កុំអោយឆ្លងរាលដាលទៅភូមិផ្សេងៗ ទៀត៕

អត្ថបទ៖ សោ និយមរ័ត្ន