ព័ត៌មានជាតិ

ចិនមានគម្រោងវិនិយោគ សេវាដឹកជញ្ជូនរថយន្តក្រុង នៅក្នុងក្រុងព្រះសីហនុ

បានផុស

៥ years មុន

នៅ

ថ្ងៃពុធ ២២ កញ្ញា ២០២១

ដោយ

អ្នកវិនិយោគចិន មានគម្រោងវិនិយោគសេវាដឹកជញ្ជូនរថយន្តក្រុង នៅក្នុងក្រុងព្រះសីហនុ ក្រោយមើលឃើញពីសន្ទុះនៃការអភិវឌ្ឍរបស់ខេត្តមួយនេះ មានការរីកចម្រើនឥតឈប់ឈររួចមក។

ខេត្តព្រះសីហនុនឹងកាន់តែមានសក្តានុពលសេដ្ឋកិច្ចខ្លាំងឡើង | La Reine Media

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងនេះ ត្រូវបានលើកឡើងនៅក្នុងជំនួបពិភាក្សា និងស្នើសុំការគាំទ្រពីលោក គួច ចំរើន អភិបាល នៃគណៈអភិបាលខេត្តព្រះសីហនុ នៅព្រឹកថ្ងៃទី២២ ខែកញ្ញា ឆ្នាំ២០២១។ តំណាងអ្នកវិនិយោគចិន បានជម្រាបជូនលោកអភិបាលខេត្តថា គម្រោងវិនិយោគសេវាដឹកជញ្ជូន(រថយន្តក្រុង)នេះ យើងមានរថយន្តក្រុងចំនួន ៣០គ្រឿង គ្រោងដាក់ឱ្យដំណើរការរត់លើខ្សែផ្លូវសំខាន់ៗមួយចំនួនក្នុងក្រុងព្រះសីហនុ។

តំណាងអ្នកវិនិយោគចិន បានបន្តថាមូលហេតុដែលលោកសម្រេចបោះទុនវិនិយោគលើសេវាដឹកជញ្ជូន(រថយន្តក្រុង)នេះ ដោយមើលឃើញពីសន្ទុះនៃការអភិវឌ្ឍរបស់ខេត្តព្រះសីហនុ មានការរីកចម្រើនឥតឈប់ឈរ អាចក្លាយជាទីក្រុងឆ្លាតវៃ ជាកន្លែងទេសចរណ៍ មជ្ឈមណ្ឌលពាណិជ្ជកម្ម និងការវិនិយោគ។

លោកអភិបាលខេត្ត បានស្វាគមន៍ និងគាំទ្រយ៉ាងពេញទំហឹងពីគោលបំណងវិនិយោគលើសេវាដឹកជញ្ជូន(រថយន្តក្រុង) នៅក្នុងក្រុងព្រះសីហនុ។ លោកអភិបាលខេត្ត បានស្នើឱ្យសិក្សាតម្លៃសេដ្ឋកិច្ចឱ្យបានល្អិតល្អន់ជាមុនសិន មុននឹងសម្រេចចុះកិច្ចព្រមព្រៀងវិនិយោគលើសេវាដឹកជញ្ជូននៅក្នុងក្រុងព្រះសីហនុ ប្រកបដោយជោគជ័យ។ លោកអភិបាលខេត្ត បានបញ្ជាក់ថា« ត្រូវសិក្សាពីប្រភពសេដ្ឋកិច្ច ខ្សែរត់ ការធ្វើចំណតរថយន្ត និងហេដ្ឋារចនាសម្ព័ន្ធគាំទ្រដល់ដំណើរការវិនិយោគលើសេវាកម្មដឹកជញ្ជូនឱ្យបានទូលំទូលាយ នៅក្រុងព្រះសីហនុ ព្រោះយើងចង់បានសេវាដឹកជញ្ជូនសាធារណៈជាការចាំបាច់ ដើម្បីចូលរួមជួយសម្រួលការធ្វើដំណើរ កាត់បន្ថយពេលវេលា និងចំណេញថវិកា»។

ទន្ទឹមនោះ លោកអភិបាលខេត្តបានណែនាំឱ្យអ្នកវិនិយោគ ត្រូវរកអ្នកជំនាញសិក្សាគម្រោង និងធ្វើបទបង្ហាញ ដើម្បីធានាការបោះទុនវិនិយោគលើសេវាដឹកជញ្ជូន នៅក្នុងក្រុងព្រះសីហនុ ទទួលបានលទ្ធផលផ្លែផ្កាល្អ៕

អត្ថបទ៖ សំអឿន