ព័ត៌មានជាតិ

រមណីយដ្ឋានថ្មដាចម្ការទុរេន ជាកន្លែងទេសចរណ៍ដ៏ទាក់ទាញភ្ញៀវខ្លាំង នាឱកាសបុណ្យភ្ជុំបិណ្ឌ

បានផុស

៤ years មុន

នៅ

ថ្ងៃព្រហស្បតិ៍ ៧ តុលា ២០២១

ដោយ

ទីតាំងកម្សាន្តតាមបែបធម្មជាតិ មើលទៅគួរជាទីទាក់ទាញអារម្មណ៍របស់ភ្ញៀវទេសចរខ្លាំង គឺរមណីយដ្ឋានស្ទឹងថ្មដាចំការទុរេន ដែលបានបើកទទួលភ្ញៀវឲ្យមកកម្សាន្ត ពិសេសក្នុងឱកាសថ្ងៃឈប់សម្រាកបុណ្យភ្ជុំបិណ្ឌនេះ។ ទីតាំងរមណីយដ្ឋានបែបធម្មជាតិ និងទាក់ទាញក្រសែភ្នែកនេះស្ថិតនៅភូមិសាស្ត្រ ភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាម ជិនឆាយ ជាអ្នកគ្រប់គ្រងនៅរមណីយដ្ឋាននេះបានរៀបរាប់ថា រមណីយដ្ឋានថ្មដាចំការទុរេន មានលក្ខណៈពិសេសដូចជា ទឹកហូរលើថ្ម ដើមឈើម្លប់ត្រជាក់ ទូកសម្រាប់អុំកម្សាន្ត ខ្ចុះសម្រាប់ភ្ញៀវអង្គុយជួបជុំមិត្តភ័ក្ដិលក្ខណៈគ្រួសារ។

លើសពីនេះ លោកថា ម្ហូបអាហារលក់នៅរមណីយដ្ឋាននេះមានតម្លៃសមរម្យ មាន់ខ្មែរមួយត្រឹម ៣៥០០០ រៀល ទៅ ៤០០០០ រៀលតែប៉ុណ្ណោះ។ ម្យ៉ាងទៀត លោកថា ភ្ញៀវអាចយកម្ហូបពីក្រៅមកបរិភោគបាន គ្រាន់តែចំណាយលើក្បាលឡាន មួយគ្រឿង ១០០០០ រៀល សម្រាប់ជាទុនក្នុងការរៀបចំកែលំអបន្ថែម។

មួយវិញទៀត លោកថា ដើម្បីចូលរួមទប់ស្កាត់ជំងឺឆ្លងកូវីដ-១៩ តាមគោលការណ៍ក្រសួងសុខាភិបាល រមណីយដ្ឋាននេះ កំណត់ភ្ញៀវទេសចរចូល ត្រូវវាស់កម្ដៅ កត់ឈ្មោះ យកលេខទូរស័ព្ទ ពិនិត្យប័ណ្ណចាក់វ៉ាក់សាំង មិនលក់គ្រឿងស្រវឹងជាដើម។ ចំណែកភ្ញៀវដែលយកគ្រឿងស្រវឹងចូល ត្រូវទទួលខុសត្រូវខ្លួនឯង។

សូមបញ្ជាក់ថា រមណីយដ្ឋានស្ទឹងថ្មដាចំការទុរេន គឺមានការអនុញ្ញាតឲ្យបើកទទួលភ្ញៀវទេសចរពីមន្ទីរទេសចរណ៍ ក្នុងឱកាសឈប់សម្រាកបុណ្យភ្ជុំបិណ្ឌនេះ ក្នុងចំណោមរមណីយដ្ឋានទាំង ១៣ កន្លែង ក្នុងខេត្តបាត់ដំបង៕

អត្ថបទ ៖ សោ និយមរ័ត្ន