ព័ត៌មានជាតិ

ស្ទឹងព្រែកត្នោត កម្រិតទឹកស្រកចុះជាងមួយម៉ែត្រ គិតនៅត្រឹមព្រឹកនេះ

បានផុស

៥ years មុន

នៅ

ថ្ងៃអង្គារ ១២ តុលា ២០២១

ដោយ

គិតមកដល់ព្រឹកថ្ងៃទី១២ ខែតុលានេះ ស្ថានភាពទឹកនៅស្ទឹងព្រែកត្នោត បានចាប់ផ្ដើមស្រកយ៉ាងខ្លាំងហើយ ប៉ុន្តែទោះបីជាយ៉ាងណាក្តី ទាំងមន្ទីរជំនាញ និងអាជ្ញាធរដែនដីនៅតែបន្តត្រៀមបង្ការទប់ស្កាត់គ្រោះមហន្តរាយជានិច្ច។

លោក ម៉ៅ ប៊ុនធឿន ប្រធានមន្ទីរធនធានទឹកនិងឧតុនិយមរាជធានីភ្នំពេញ បានបញ្ជាក់ឲ្យដឹងនៅព្រឹកថ្ងៃទី ១២ ខែតុលានេះថា ស្ថានភាពទឹកនៅស្ទឹងព្រែកត្នោតបានស្រកចុះ១ម៉ែត្រ សម្រាប់ថ្ងៃទី១២ តុលានេះ ពោលគឺទឹកបានស្រកព្រមៗ គ្នាទាំងកម្ពស់ទឹកនៅខេត្តកំពង់ស្ពឺ កម្ពស់ទឹកនៅខេត្តកណ្ដាល និងកម្ពស់ទឹកនៅរាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបញ្ជាក់ទៀតថា សម្រាប់ថ្ងៃ១២ ខែតុលា នេះ កម្ពស់ទឹកនៅចំណុចស្ពានឃ្លៃ មានកម្ពស់៤,២០ម៉ែត្រ ស្រកចុះ ០,៥ម៉ែត្រ បើប្រៀបធៀបកាលពីម្សិលមិញ ចំណុចរលាំងជ្រៃកម្ពស់ទឹក៦,៩០ម៉ែត្រ ស្រកចុះ០,០២ម៉ែត្រ បើប្រៀបធៀបកាលពីម្សិលមិញ និងចំណុចស្ពានកំពង់ទួល(ស្ពាន៧មករា) កម្ពស់ទឹក៦,២០ម៉ែត្រ ស្រកចុះ១ម៉ែត្រ បើប្រៀបធៀបកាលពីម្សិលមិញ។

លោកបញ្ជាក់បន្តថា ស្ថានភាពទឹកនៅពេលនេះ មិនមានអ្វីជាបញ្ហានោះទេ ប៉ុន្តែមន្រ្តីក៏នៅតែសង្កេតមើលស្ថានភាពទឹកនិងអាកាសធាតុបន្តទៀត ។

លោក ម៉ៅ ប៊ុនធឿន បានបន្តទៀតថា ចំពោះវិធានការបង្ការទប់ស្កាត់គ្រោះទឹកជំនន់នេះ អាជ្ញាធរនៅតែបន្តត្រៀមដដែល ទៅតាមការណែនាំរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ ដោយពេលនេះ មន្ទីរធនធានទឹកនិងឧតុនិយមរាជធានីភ្នំពេញ បានលើកកូនទំនប់តូចមួយនៅលើទំនប់ចាស់ ដែលកំពុងធ្វើសកម្មភាពយ៉ាងមមាញឹក ។

លោក ឃួង ស្រេង បានណែនាំឲ្យមន្ទីរធនធានទឹកតាមដានមើលស្ថានភាពទឹកជាប្រចាំ បើមានបញ្ហាអ្វីកើតឡើងអាចជួយសង្គ្រោះបងប្អូនប្រជាពលរដ្ឋបានទាន់ពេល និងមិនបង្កអោយខូចខាតទ្រព្យសម្បត្តិផងដែរ ។

លោក ម៉ៅ ប៊ុនធឿន ក៏បានបញ្ជាក់ទៀតថា សម្រាប់ក្រសួងធនធានទឹកនិងមន្ទីរធនធានទឹករាជធានីភ្នំពេញ នៅតែប្រជុំពិគ្រោះយោបល់ពីវឌ្ឍនៈភាពផ្លូវទឹក និងការបង្វែរផ្លូវទឹកទៅតំបន់ដែលមិនមានហានិភ័យ ពេលមានបញ្ហាជនលិច៕

អត្ថបទ៖ ស្រីរ័ត្ន