គ្រោះថ្នាក់ទាំង​យប់ តៃកុង​​រថយន្ត Prius បាន​ស្លាប់ ជិះ​រថយន្ត​​បុក​របង​ផ្ទះ​ប្រជាពលរដ្ឋ​

ភ្នំពេញ ៖ បុរសជាតៃកុងរថយន្តម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ រីឯអ្នករួមដំណើរម្នាក់ទៀតរបួសធ្ងន់ បន្ទាប់ពីបើករថយន្តម៉ាក Toyota PRIUS ក្នុងល្បឿនយ៉ាងលឿនបានទៅបុករបងផ្ទះ រួចបោកផ្ទប់បង្គោលភ្លើង កាលវេលាម៉ោង២ និង១០នាទីយប់រំលងអធ្រាត្រ ឈានចូលថ្ងៃទី១៤ ខែតុលា ឆ្នាំ២០២១ ស្ថិតតាមបណ្ដោយផ្លូវទន្លេសាប សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

រថយន្តបង្កម៉ាក Toyota PRIUS ពណ៌ស ពាក់ស្លាកលេខ ភ្នំពេញ 2BL-6955 បើកបរដោយបុរសម្នាក់ មិនស្គាល់អត្តសញ្ញាណ (ស្លាប់នៅក្នុងរថយន្ត) និងរួមដំណើរម្នាក់ទៀត រងរបួសធ្ងន់ត្រូវបានបញ្ជូនទៅសង្គ្រោះនៅមន្ទីពេទ្យ។

តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តបង្ក បើកល្បឿនលឿនដូចហោះ និង​ឮ​សូរ​ធុងបាស់ខ្លាំងៗចេញពីក្នុងរថយន្ត ទិសដៅពីត្បូងទៅជើង ខណៈមកដល់ចំណុចកើតហេតុ បានរេចង្កូតមកខាងស្ដាំដៃជ្រុល ទៅបុករបងផ្ទះគេ រួចបោកផ្ទប់បង្គោលភ្លើង បណ្ដាលរថយន្តស្ទើរដាច់ជាពីរហើយតៃកុងបានស្លាប់ក្នុងរថយន្តភ្លាមៗតែម្តង។ រីឯអ្នករួមដំណើរម្នាក់ទៀតរងរបួសធ្ងន់ បញ្ជូនទៅមន្ទីរពេទ្យ។

ក្រោយកើតហេតុ សមត្ថកិច្ចវាស់វែងយករថយន្តទៅរក្សាទុក។ ចំណែកសពដឹកយកទៅតម្កល់ទុកនៅវត្តទឹកថ្លា រង់ចាំសាច់​ញាតិមកយកទៅធ្វើបុណ្យតាមប្រពៃណី៕

អត្ថបទ៖ ឧត្តរ៉ា