អាជ្ញាធរសង្កាត់ច្បារអំពៅទី ១ ចុះធ្វើអនាម័យបោស និងកើបសំរាម តាមច្រាំងទន្លេបាសាក់

លោក ពៅ ហួត ចៅសង្កាត់ច្បារអំពៅទី ១ នៅព្រឹកថ្ងៃទី ៩ ខែធ្នូ ឆ្នាំ ២០២១នេះ បានដឹកនាំកម្លាំងចុះធ្វើអនាម័យបោស និងកើបសំរាមតាមច្រាំងទន្លេបាសាក់ ក្នុងមូលដ្ឋានសង្កាត់ច្បារអំពៅទី ១ ខណ្ឌច្បារអំពៅ រាជធានីភ្នំពេញ។

លោក ពៅ ហួត បានឲ្យដឹងថា មូលហេតុ ដែលលោកបានដឹកនាំកម្លាំង ចុះប្រមូលសំរាមនៅតាមច្រាំងទន្លេនាថ្ងៃនេះ គឺដើម្បីថែរក្សាបរិស្ថាន ជាពិសេសការថែទាំទឹកទន្លេ ដែលងាយរងការកខ្វក់ ដោយសារសំរាម​ហូរធ្លាក់ចូលទៅក្នុងទឹក។

ក្នុងនោះដែរ លោកចៅសង្កាត់ច្បារអំពៅទី ១ បានណែនាំដល់ប្រជាពលរដ្ឋ ដែលរស់នៅក្បែរច្រាំងទន្លេ សូមទុកដាក់សំរាម និងវិចខ្ចប់ឲ្យបានត្រឹមត្រូវ និងរង់ចាំឲ្យរថយន្តដឹកសំរាមមកដឹក ដោយមិនត្រូវយកសំរាមបោះចូលទៅក្នុងទឹកទន្លេ ឬយកមកចាក់គរ នៅតាមមាត់ច្រាំងទន្លេ ជាបន្តទៅទៀត។

ប្រសិនបើប្រជាពលរដ្ឋ នៅបន្តយកសំរាមបោះចូលក្នុងទន្លេ គឺអាជ្ញាធរនឹងមានវិធានការណ៍ ចាប់ផាកពិន័យដោយមិនលើកលែងឡើយ។ សំរាមដែលស្ថិត នៅតាមមាត់ច្រាំងទន្លេនេះ ពុំមែនអ្នកមកក្រៅយកសំរាម យកមកចាក់នៅទីនេះដែរ គឺមានតែអ្នករស់នៅក្បែដងច្រាំងទន្លេនេះតែម្តង។ ដូច្នេះសូមចូលរួមថែរក្សាបរិស្ថានទាំងអស់គ្នា ព្រោះបើគ្មានការចូលរួមពីប្រជាពលរដ្ឋទេ គឺបញ្ហាបរិស្ថាន នៅតែមិនអាចដោះស្រាយបានដដែល៕

អត្ថបទ៖ នរា