តុលាការក្រុងភ្នំពេញ សម្រេចបើកបន្តសវនាការលោកកឹម សុខា ឡើងវិញនៅថ្ងៃទី២២ ខែមករា ខាងមុខ

នៅទីបំផុត តុលាការសាលាដំបូងរាជធានីភ្នំពេញ បានសម្រេចបើកបន្តសវនាការលោក កឹម សុខា ឡើងវិញហើយ គឺនៅថ្ងៃទី២២ ខែមករា ឆ្នាំ២០២២ខាងមុខ វេលាម៉ោង ៨ និង៣០នាទីព្រឹក។ នេះបើតាមដីកាកោះហៅលោក កឹម សុខា ឱ្យចូលសវនាការបន្តចុះថ្ងៃទី១៣ ខែធ្នូ ម្សិលមិញ តែទើបត្រូវបានលោក តាំង ស៊ុនឡាយ ប្រធានសាលាដំបូងរាជធានីភ្នំពេញផ្ញើឱ្យកម្ពុជាថ្មីនៅរសៀលថ្ងៃអង្គារនេះ។

តាមដីកោះហៅចូលសវនាការបន្តនេះ គឺសមាសភាពក្រុមប្រឹក្សាជំនុំជម្រះនៅក្នុងសវនាការ រួមមាន លោក កូយ សៅ ប្រធានក្រុមប្រឹក្សាជំនុំជម្រះ លោក សេង លាង ចៅក្រមប្រឹក្សា លោក ធាម ច័ន្ទពិសិដ្ឋ ចៅក្រមប្រឹក្សា និងលោក ប្លង់ សុផល ជាព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។

ការបន្តសវនាការឡើងវិញនេះ គឺបន្ទាប់ពីតុលាការបានសម្រេចផ្អាកជិត២ឆ្នាំមកហើយតាំងពីក្នុងខែមីនា​ ឆ្នាំ២០២០មកម្លេះ ដោយសារការឆ្លងរាលដាលខ្លាំងនៃជំងឺកូវីដ១៩។ លោក កឹម សុខា ត្រូវបានតុលាការចោទប្រកាន់ពីបទ សន្ទិដ្ឋិភាពជាមួយបរទេស ចង់ផ្តួលរំលំរាជរដ្ឋាភិបាលកម្ពុជា៕

អត្ថបទ៖ វណ្ណ សុគន្ធា