រដ្ឋបាលខេត្តបន្ទាយមានជ័យ ប្រជុំត្រៀមរៀបចំ ប្រឡងសញ្ញាបត្រទុតិយភូមិ ២០២១

ខេត្តបន្ទាយមានជ័យ៖ រដ្ឋបាលខេត្តបន្ទាយមានជ័យ បានបើកកិច្ចប្រជុំស្តីការត្រៀមប្រឡងសញ្ញបត្រមធ្យមសិក្សាទុតិយភូមិ ឆ្នាំសិក្សា ២០២០-២០២១ នៅ ថ្ងៃទី២៧-២៨ ខែធ្នូ ខេត្តបន្ទាយមានជ័យ ដោយមានការចូលរួម លោក អ៊ុំ រាត្រី អភិបាលខេត្តបន្ទាយមានជ័យ លោក ឈូ ប៊ុនរឿង ប្រធានមន្ទីរអប់រំ យុវជន និងកីឡា ខេត្តបន្ទាយមានជ័យ ព្រមទាំងប្រធានមន្ទីរ និងកម្លាំងពាក់ព័ន្ធជាច្រើននាក់ទៀត។

លោក ឈូ ប៊ុនរឿង បានមានប្រសាសន៍ក្នុងកិច្ចប្រជុំនោះថា ការប្រឡងសញ្ញបត្រមធ្យមសិក្សាទុតិយភូមិ ឆ្នាំសិក្សា ២០២០-២០២១ នៅ ថ្ងៃទី ២៧-២៨ ខែធ្នូ ខាងមុខនេះ សិស្សានុសិស្សដែលមានឈ្មោះប្រឡង ត្រូវគោរពតាមម៉ោងពេល វិន័យប្រឡង ហាមយកសំណៅ ឯកសារចម្លើយ ក៏ដូចឧបករណ៍អេឡិចត្រូនិច ពោលគឺត្រូវគោរពបទបញ្ជា បទបញ្ញត្តិដែលក្រសួងអប់រំបានដាក់ចេញ គឺការរឹតបន្តឹងនេះ ធានាថា អ្នកចេះគឺជាប់។

លោក អ៊ុំ រាត្រី អភិបាលខេត្តបន្ទាយមានជ័យមានប្រសាសន៍អបអរសាទរ លើកទឹកចិត្តដល់បេក្ខជន បេក្ខនារីប្រឡងជាប់ តែក៏ផ្តល់កម្លាំងចិត្តដល់បេក្ខជនប្រឡងធ្លាក់ កុំអស់សង្ឃឹម ហើយខិតខំតស៊ូរៀនសូត្រឡើងវិញដើម្បីប្រឡងជាប់នៅឆ្នាំក្រោយ ឬក៏អាចចូលរៀនតាមសាលាបណ្តុះបណ្តាលវិជ្ជាជីវ: រៀនថ្នាក់បរិញ្ញាប័ត្ររងបានដែរ៕

អត្ថបទ៖ វ៉ាន់ ណាង