ជនសង្ស័យ២នាក់ ត្រូវបញ្ជូនទៅតុលាការ ពីបទរក្សាទុក និងជួញដូរនូវសារធាតុញៀន

បាត់ដំបង៖ ជនសង្ស័យជាមុខសញ្ញា ២ នាក់ និងវត្ថុតាង ត្រូវមន្ត្រីការិយាល័យជំនាញនៃស្នងការខេត្ត ត្រៀមញ្ជូនទៅតុលាការ ក្រោយបញ្ចប់ការសាកសួរ និងរៀបចំសំណុំរឿងនៅព្រឹកថ្ងៃទី០៥ ខែមីនា ឆ្នាំ២០២២នេះរួចរាល់។

ជនសង្ស័យត្រូវបានកម្លាំងជំនាញនៃអធិការស្រុកឃាត់ខ្លួនកាលពីថ្ងៃទី០៤ ខែមីនា ឆ្នាំ​២០២២ ម្សិលមិញ នៅវេលាម៉ោង១៤ និង១០នាទី នៅចំណុចក្រុមទី​០៣ ​ភូមិតាសាញជើង ឃុំតា​សាញ ស្រុកសំឡូត ខេត្តបាត់​ដំបង ក្រោយពីតាមប្រមាញ់កន្លងមក។

លោកវរសេនីយ៍ទោ ម៉ែន រីម អធិការនគរ​បាលស្រុក​សំឡូ​ត​ បានឱ្យដឹងថា ក្រោយពីបានកំណត់មុខសញ្ញាជនសង្ស័យទាំង២នាក់ លោកបានដឹកនាំកម្លាំងផ្នែកប្រឆាំងគ្រឿង​ញៀនរួមជាមួយកម្លាំងអន្តរាគមន៍ នៃ​អធិ​ដ្ឋានន​គរបាលស្រុកសំឡូត ចុះ​ប្រ​តតិបត្តិការបង្រ្កាបតែម្តង ក្នុងករណីរក្សាទុកជួញដូរដោយខុសច្បាប់នូវសារធាតុញៀន ក្នុងបទល្មើសជាក់​ស្តែង។

ក្នុងការបង្ក្រាបខាងលើ កម្លាំងបានឃាត់ខ្លួនជនសង្ស័យបានចំនួន០២នាក់ រួមមានឈ្មោះ ឈិន ស្មីត ភេទប្រុស អាយុ២៥ឆ្នាំ មានទីលំនៅភូមិអូរសំរិលលើ ឃុំអូរសំរិល ស្រុកសំឡូត ខេត្តបាត់ដំបង។ និងឈ្មោះ ស្រេង នី ភេទប្រុស អាយុ៣១ឆ្នាំ មានទីលំនៅភូមិតាសាញជើង ឃុំតា​សាញ ស្រុកសំឡូត ខេត្តបាត់ដំបង។

សេនីយ៍ទោ ម៉ែន រីម បន្តថា សមត្ថកិច្ចបានចាប់បានវត្ថុតាងរួមមាន ម្សៅក្រាមពណ៌សថ្លាច្រកក្នុងកូនថង់ប្លាស្ទិចពណ៌សថ្លា ចំនួន០៣ថង់ ទម្ងន់ ៩,៤៩ ក្រាម (ទាំងសំ​បក) ​សង្ស័យ​​មានសារធាតុញៀន។

ករណីខាងលើនេះសមត្ថកិច្ចនគរបាលនៃអធិការស្រុក បានរៀបចំកសាងសំ​ណុំរឿងបញ្ជូនជនសង្ស័យ និងវត្ថុតាងមកកាន់ការិយាល័យជំនាញនៃស្នងការដ្ឋាននគរ​បាលខេត្តបាត់ដំបង ដើម្បីចាត់ការបន្តតាមនីតិវិធី​៕

អត្ថបទ៖ សៅ សារិទ្ទ