លោកវេជ្ជបណ្ឌិត លី សូវ៉ាន់ បញ្ជាក់លទ្ធផល នៃ អ្នកជំងឺសង្ស័យឆ្លងជំងឺផ្តាសាយបក្សី ១៣ នាក់

លោកវេជ្ជបណ្ឌិត លី សូវ៉ាន់ ប្រធាននាយកដ្ឋាន ប្រយុទ្ធនឹងជំងឺឆ្លង នៃក្រសួងសុខាភិបាល បានមានប្រសាសន៍នៅព្រឹកថ្ងៃទី១៤ ខែមីនានេះថា អ្នកជំងឺសង្ស័យចំនួន ១៣ នាក់ ក្នុងនោះមានស្រី ៧ នាក់ រស់នៅក្នុងភូមិត្រពាំងរុន ឃុំឫស្សីលក ស្រុកជីក្រែង ខេត្តសៀមរាប មិនមានឆ្លងជំងឺផ្តាសាយបក្សីប្រភេទ A/H9 នោះទេ។

លោកវេជ្ជបណ្ឌិត លី សូវ៉ាន់ បានបន្តថា បើតាមការសន្និដ្ឋានអ្នកជំងឺសង្ស័យទាំង ១៣ នាក់នោះ អាចបណ្តាលមកពីអាលាក់ហ្សីជាមួយអាកាសធាតុ ឬមានជំងឺផ្តាសាយធម្មតា។

លោកវេជ្ជបណ្ឌិត លី សូវ៉ាន់ បានបន្តទៀតថា យ៉ាងណាក៏ដោយក្រុមការងាររបស់លោកបាន និងកំពុងបន្តតាមដាន និងស្រាវជ្រាវរកករណីសង្ស័យជំងឺផ្តាសាយបក្សីប្រភេទ A/H9 នៅជុំវិញភូមិត្រពាំងរុន ជាបន្តទៀត ជាទីដែលទារិកាអាយុ ១ឆ្នាំ ១ខែ ម្នាក់បានឆ្លង។

លោកវេជ្ជបណ្ឌិត លី សូវ៉ាន់ បានអំពាវនាវដល់ប្រជាពលរដ្ឋបើមានករណីសង្ស័យថា មានជំងឺផ្តាសាយបក្សីដូចជាមានរោគសញ្ញា គ្រុនក្តៅលើសពី ៣៨,៥ អង្សាសេ មាន ក្អក ឈឺក និង ហត់ ឬមានមាន់ទាងាប់ឈឺច្រើន សូមប្រញាប់រាយការណ៍មកលេខ ១១៥ ឬអ្នកស្ម័គ្រចិត្តភូមិ ដើម្បីរួមគ្នាទប់ស្កាត់ការចម្លងឱ្យបានទាន់ពេលវេលា។

ជាមួយគ្នានេះ លោកវេជ្ជបណ្ឌិត លី សូវ៉ាន់ បានអំពាវនាវដល់ប្រចាពលរដ្ឋកុំបរិភោគសត្វមាន់ ឬទាដែលឈឺ និងងាប់ និងត្រូវយកទៅកប់ ឬដុតចោល ដើម្បីបង្ការទប់ស្កាត់ការឆ្លងជំងឺផ្តាសាយបក្សីប្រភេទ A/H9 ពិសេសដើម្បីទប់ស្កាត់កុំឱ្យមានការចម្លងពីមនុស្សម្នាក់ទៅមនុស្សម្នាក់ទៀត។

នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានរកឃើញមានមាន់ងាប់ជាបន្តបន្ទាប់ នៅក្នុងភូមិត្រពាំងរុន ចាប់តាំងពីខែកុម្ភ: ២០២២ កន្លទៅ។ តាមលទ្ធផលដោយមន្ទីរពិសោធន៍ថ្នាក់ជាតិ នៅថ្ងៃទី១០ ខែមីនា ឆ្នាំ២០២២ បញ្ជាក់ថា មានវិជ្ជមាន Influenza A/H9 ទៅលើទារិកាអាយុ ១ឆ្នាំ ១ខែមា្នក់ នៅក្នុងភូមិត្រពាំងរុន ឃុំឫស្សីលក ស្រុកជីក្រែង ខេត្តសៀមរាប ដែលបច្ចុប្បន្នបានជាសះស្បើយ៕

អត្ថបទ៖ សំអឿន