តារាចម្រៀង ម៉េង កែវពេជ្ជតា មោទនភាពខ្លាំងក្រោយកូនប្រុសបួសសងគុណម្តាយ

តារាចម្រៀងជើងចាស់អ្នកនាង ម៉េង កែវពេជ្ជតា បានបង្ហាញអារម្មណ៍រំភើបនិងមានមោទនភាពខ្លាំងបន្ទាប់ពីកូនប្រុសជាទីស្រលាញ់របស់ខ្លួនបានសម្រេចចិត្តចូលបួសសមតាមបំណង។

តាមការបញ្ជាក់ឱ្យដឹងពីសំណាក់កំពូលតារាចម្រៀងអ្នកនាងម៉េង កែវពេជ្ជតា បាននិយាយថា គិតមកដល់ពេលនេះ កូនប្រុសខ្លួនគឺបានចូលសាងផ្នួសមានរយ:ពេលប្រមាណ៤ថ្ងៃហើយ ខណ:ក្នុងនាមអ្នកនាងជាម្តាយពិតជាមានក្តីរំភើបក្នុងចិត្តខ្លាំងណាស់ដែលឃើញកូនប្រុសកត្តញ្ញូបែបនេះ។

អ្នកនាង ម៉េង កែវពេជ្ជតា បានរៀបរាប់ថាជ្រះថ្លាណាស់លោកកូនម្ដាយរំភើបចិត្តនិយាយមិនចង់ចេញសាងផ្នួសម៉ែម្នាក់នេះគឺជាម្ដាយដែលមានសំណាងបំផុត ដោយមានកូនប្រុសកូនស្រីទាំងពីរជាកូនរបស់ម៉ែឃើញលោកកូននិមន្តមកពីសាលាឆាន់ ដោយមានកាន់សៀវភៅធម៌ផង ក្នុងចិត្តម៉ែសែនរំភើប លួចញញឹមក្នុងចិត្តមិនឈប់។

កំពូលតារាចម្រៀងស្រីអ្នកនាង ម៉េង កែវពេជ្ជតាបានបន្តទៀតថារហូតមកដល់ថ្ងៃនេះកូនប្រុសឈ្មោះ រតនៈ គឺបួសបាន៤ថ្ងៃហើយដោយក្នុងនោះអ្នកនាងក៏បានបង្ហោះវីដេអូជាបន្តបន្ទាប់ជាមួយនឹងអារម្មណ៍ដ៏រំភើបផងដែរ។ ទន្ទឹមគ្នានោះ ក៏មានអ្នកគាំទ្រមួយចំនួនសរសើរដែរថា អ្នកនាង ម៉េង កែវពេជ្ជតា ចិញ្ចឹម អប់រំកូនបានល្អទោះបីជាអ្នកនាងរស់នៅមានឈ្មោះស្រ្តីមេម៉ាយក៏ដោយ៕ ដោយ៖ ចាន់រ៉ា