អភិបាលខេត្តបាត់ដំបង ព្រមានមន្ដ្រីពាក់ព័ន្ធបទល្មើសធនធានធម្មជាតិ ត្រូវប្រញាប់ដកខ្លួនចេញជាបន្ទាន់

លោក សុខ លូ អភិបាលនៃគណៈអភិបាលខេត្តបាត់ដំបង បានធ្វើការព្រមានដល់មន្ដ្រីទាំងឡាយណា ដែលមានការពាក់ព័ន្ធទៅនឹងបទល្មើស ព្រៃឈើ ព្រៃលិចទឹក និងដែនអភិរក្សផ្សេងៗត្រូវប្រញាប់ដកខ្លួនចេញជាបន្ទាន់ចៀសវាង​ប្រឈម​ទៅនឹង​មុខ​ច្បាប់​។​

​ការព្រមាន​នេះ​ បាន​ធ្វើឡើង​នៅក្នុង​កិច្ចប្រជុំ​ពិភាក្សា ស្ដីពី​របាយការណ៍​លទ្ធ​ផល​នៃ​ការ​ស្រង់​ព័ត៌មាន ដែល​ប្រជាពលរដ្ឋ​កាន់កាប់​អាស្រ័យ​ផល​ជាក់ស្ដែង​យូរ​ឆ្នាំ នៅក្នុង​ខេត្តបាត់ដំបង​កាល​រសៀល​ថ្ងៃទី ​២៤ ខែមីនា ឆ្នាំ​ ២០២២។ លោក​អភិបាលខេត្ត​ បាន​មានប្រសាសន៍ថា​« មន្ដ្រី​ណា​ដែលមាន​ការពាក់ព័ន្ធទៅនឹង​បទល្មើស​ខាងលើ ត្រូវ​ប្រញាប់​ដកខ្លួន​ចេញ​ជាបន្ទាន់ និង​ត្រូវ​សហការ​ជាមួយ​អាជ្ញា​ធរមាន​សមត្ថកិច្ច ហើយ​មិន​ត្រូវធ្វើ​គេចវេះ​ឡើយ បើ​ពុំ​នោះទេ​នឹងត្រូវ​ប្រឈមមុខ​ច្បាប់​ដោយ​មិនត្រូវ​មានការ​លើកលែង​ជាដាច់ខាត​»​។

​ជាមួយគ្នានេះដែរ លោក​អភិបាល​ខត្ត​បាន​ណែនាំ​ទៅដល់​បណ្ដា​ស្រុក​ពាក់ព័ន្ធ កងកម្លាំងប្រដាប់អាវុធ ត្រូវតែ​បន្ត​ក្នុងការ​ទប់ស្កាត់​ការបំផ្លិចបំផ្លាញ​នូវ​សម្បត្តិ​ធម្មជាតិ​របស់​រដ្ឋ និង​ជាពិសេស​ធ្វើការ​បង្ក្រាប​ទៅលើ​ជន​ណា​ ដែលមាន​សកម្មភាព​បំផ្លិចបំផ្លាញ​ទាក់ទង​ទៅនឹង​បទល្មើស​ព្រៃឈើ ព្រៃ​លិច​ទឹក ដែន​អភិរក្ស​ផ្សេងៗ ដោយ​មិនត្រូវ​មានការ​លើកលែង​ឡើយ គឺ​ត្រូវតែ​ធ្វើការ​អនុវត្ត​ទៅតាម​ច្បាប់​នៃ​ព្រះរាជាណាចក្រ​កម្ពុជា​។

​ទន្ទឹមនឹងនេះ លោក​អភិបាលខេត្ត​បាន​ជំរុញ​ដល់ អភិបាលស្រុក មន្ដ្រី​ជំនាញ កងកម្លាំងប្រដាប់អាវុធ ត្រូវតែ​ប្ដេជ្ញា​ចូលរួម​សហការ​ឲ្យ​បាន​ទប់ស្កាត់​បទល្មើស​នេសាទ នៅ​តំបន់​បឹង​ទន្លេសាប​នៅក្នុង​ភូមិសាស្ដ្រ​របស់ខ្លួន ក្នុងករណី​មាន​បទល្មើស​នេសាទ មិន​ថា​ទ្រង់ទ្រាយ​ធំ​ឬ​តូច​ត្រូវតែ​ធ្វើការ​ទប់ស្កាត់ ដើម្បី​រក្សា​នូវ​ពូជ​មច្ឆជាតិ​នៅក្នុង​បឹង​ទន្លេសាប​កុំ​ឲ្យ​បាត់បង់​។ នៅក្នុង​ពិធី​បិទ​សន្និបាត បូកសរុប​ការងារ​ក្រសួងកសិកម្ម រុក្ខាប្រមាញ់ និង​នេសាទ​ប្រចាំឆ្នាំ ២០២១ និង​ទិសដៅ​អនុវត្ត​ឆ្នាំ ២០២២ នៅ​រសៀល​ថ្ងៃទី ២៣ ខែមីនា ឆ្នាំ ២០២២ ​សម្ដេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បានចេញ​បទបញ្ជា​ឲ្យ​អាជ្ញាធរខេត្ត​នៅ​ជុំវិញ​បឹង​ទន្លេសាប ត្រូវ​បង្ក្រាប​បទល្មើស​នេសាទ​ពី​ក្រុម​ជន​ខិត​ខូច ដើម្បី​ទប់ស្កាត់​ការបាត់បង់​ធនធាន​ត្រី នៅក្នុង​បឹង​ទន្លេសាប​។​

​ក្នុងនោះ​សម្ដេច​តេ​ជោ ហ៊ុន សែន បាន​ណែនាំ​ឲ្យ​អាជ្ញាធរខេត្ត​ជុំវិញ​បឹង​ទន្លេសាប ត្រូវ​រៀបចំ​ផែនការ​ឲ្យ​បានច្បាស់លាស់ ដើម្បី​បង្ក្រាប​បទល្មើស​នេសាទ​នៅ​មូលដ្ឋាន​របស់ខ្លួន ដោយ​ត្រូវ​សហការ​ជាមួយ​ក្រសួង​-​ស្ថាប័ន​ពាក់ព័ន្ធ និង​អគ្គមេបញ្ជាការ​កងយោធពល​ភូមិន្ទ ព្រមទាំង​អគ្គស្នងការ​នគរបាល​ជាតិ ដើម្បី​កម្ចាត់​ចោល​មេ​ឈ្មួញ បំផ្លាញ​ធនធាន​ត្រី​នៅក្នុង​បឹង​ទន្លេសាប​។​

​ជាមួយគ្នានេះ សម្តេចនាយក​រដ្ឋមន្ត្រី ហ៊ុន សែន ក៏បាន​គូសបញ្ជាក់ថា ត្រូវតែ​កម្ចាត់​ក្រុម​ជនល្មើស​ឲ្យ​បាន ហើយ​បើ​ចាំបាច់​ត្រូវ​ប្រើប្រាស់​ឧទ្ធម្ភាគចក្រ ដើម្បី​ដេញចាប់ និង​បង្ក្រាប​ពីលើ​តែម្តង​៕

​អត្ថបទ៖ សំអឿន​

​