ប្តីស្លាប់ប្រពន្ធជាប់ទោស ដោយសារប្តីប្រមឹកបង្ករឿងធ្វើបាបប្រពន្ធ ស្ទើរគ្មានថ្ងៃលោះ

ខេត្តបន្ទាយមានជ័យ៖ ប្តីប្រមឹកខួបម្នាក់ចេញមកពីផឹកស្រាស្រវឹងជោកជាំ ហើយមកដល់ផ្ទះបង្កជម្លោះនឹងប្រពន្ធ វាយគ្នាទៅវិញទៅមក ប្រពន្ធទ្រាំមិនបានយកដំបងឫស្សីវាយប្តីរហូងដល់ស្លាប់។

នគរបាលមូលដ្ឋានបានឱ្យដឹងថា រឿងរាងនេះកើតឡើងនៅវេលាម៉ោង ១០ យប់ ថ្ងៃទី២៨ ខែមីនា ឆ្នាំ២០២២ បុរសជាប្ដីមានឈ្មោះ ឆែម ថងយូ អាយុ ៤១ ឆ្នាំ រស់នៅភូមិគោកពន្លៃ ឃុំចំណោម ស្រុកមង្គលបូរី ចំណែកប្រពន្ធឈ្មោះ ជា រេត អាយុ ៤០ ឆ្នាំ។

នគរបាលមូលដ្ឋានបានឱ្យដឹងបន្តទៀតថា មុនពេលកើតហេតុនោះ ក្រោយពីផឹកស្រាស្រវឹងជោកជាំ បុរសជាប្ដីបានវិលត្រឡប់មកផ្ទះវិញ។ គ្រាន់មកដល់ផ្ទះភ្លាមប្ដីបានយកដូងខ្ចីមកគុបចំក្បាលប្រពន្ធ។ ពេលនោះប្រពន្ធខឹងខ្លាំង បានស្ទុះទៅច្របាច់កប្តី ផ្ទុះកំហឹង ប្តីប្រពន្ធបានវាយប្រតាយប្រតប់គ្នាពេញទំហឹង។ ប្រពន្ធបានច្រានប្ដីដួលទៅលើដី ហើយបានយកដំបងឫស្សីទៅវាយទៅលើប្តីចំក្បាល និងមុខជាច្រើនដំបង បណ្ដាលឱ្យស្លាប់នៅនឹងកន្លែង។

ក្រោយពីកើតហេតុហើយ ប្រពន្ធត្រូវសមត្ថកិច្ចឃាត់ខ្លួនបញ្ជូនយកមកអធិការដើម្បីធ្វើកំណត់ហេតុ ចំណែកប្តីត្រូវក្រុមគ្រួសារយកទៅធ្វើបុណ្យតាមប្រពៃណី។

គួរបញ្ជាក់ថា បុរសជាប្ដីដើរផឹកស្រាស្រវឹងជារៀងរាល់ថ្ងៃ ហើយមកដល់ផ្ទះវិញ តែងតែប្រើអំពើហិង្សាលើប្រពន្ធរាល់ថ្ងៃមិនស្រាកស្រាន្ត៕

អត្ថបទ៖ វ៉ាន់ ណាង