សុខភាព

តើអ្នកធ្លាប់ឮអំពីជំងឺពុកឆ្អឹងដែរឬទេ? តើវាមានផលវិបាកអ្វីខ្លះ?

បានផុស

៥ years មុន

នៅ

ថ្ងៃព្រហស្បតិ៍ ១៧ ធ្នូ ២០២០

ដោយ

ជំងឺពុកឆ្អឹង ជាជំងឺរ៉ាំរ៉ៃបណ្តាលមកពីការថយចុះនូវកំហាប់ឆ្អឹង ដែលធ្វើឲ្យអ្នកជំងឺងាយរងនូវការបាក់ឆ្អឹងជាងមនុស្សទូទៅ។ ជំងឺនេះច្រើនកើតលើមនុស្សអាយុច្រើនចាប់ពី៥០ឆ្នាំឡើងទៅ និងក្រុមស្ត្រីក្រោយអស់រដូវ។ យើងក៏ជួបផងដែរ លើមនុស្សវ័យក្មេង ដោយសារកត្តាតំណពូជ និងកត្តាផ្សេងៗ ដែលធ្វើឲ្យកំហាប់ឆ្អឹងថយចុះ ដូចជា៖

– កង្វះអ័រម៉ូន អ៊ឺស្ត្រូហ្សែន

– កត្តាហ្សេនេទិច

– ស្គម

– មិនសូវហាត់កីឡា

– បរិភោគអាហារ ដែលមានសារជាតិកាល់ស្យូមតិច

– ការជក់បារី និងពិសាស្រា

១) ហេតុអ្វីយើងគួរស្វែងយល់ពីជំងឺនេះ?

– វាបង្កឲ្យមានការឈឺចាប់

– វាងាយនឹងបាក់ឆ្អឹង

– វាបង្កពិការភាពយូរអង្វែង

២) រោគសញ្ញាសំខាន់ៗ

– បាក់ឆ្អឹង ក្រោយពីរងគ្រោះថ្នាក់ស្រាល

– ឈឺឆ្អឹងកងចង្កេះ (ឈឺបន្តិចម្ដងៗ ច្រើនខែ)

– បាក់ក្បាលឆ្អឹងភ្លៅ ក្រោយរអិលដួលតិចតួច ឬបាក់កដៃក្រោយច្រត់ ឬទប់ខ្លួន

– ប៉ុន្តែពាក់កណ្ដាលនៃករណី អ្នកជំងឺពុំមានរោគសញ្ញាគួរឲ្យចាប់អារម្មណ៍ទេ

៣) ការធ្វើរោគវិនិច្ឆ័យ

– ធើ្វរោគវិនិច្ឆ័យ ដោយម៉ាស៊ីនវាស់កំហាប់ឆ្អឹង

– ថតកាំរស្មីពិនិត្យឆ្អឹង

– ពិនិត្យឈាម (កម្រិតជាតិកាល់ស្យូម កម្រិតជាតិផូសស្វ័រ អ័រម៉ូនទីរ៉ូអ៊ីត ប៉ារ៉ាទីរ៉ូអ៊ីត…..)

– ពិគ្រោះយោបល់ជាមួយគ្រូពេទ្យឯកទេស

៤) តើយើងអាចការពារ និងព្យាបាលជំងឺនេះបានដែរឬទេ?

– ជំងឺនេះអាចការពារ និងព្យាបាលបាន ដោយទទួលការណែនាំ និងពិសាថ្នាំ

– ការព្យាបាលទៅតាមមូលហេតុរបស់វា

៥) ការណែនាំសម្រាប់អ្នកជំងឺឆ្អឹងពុក

– បរិភោគអាហារដែលសំបូរជាតិកាល់ស្យូម វីតាមីន D3 (កូនត្រីតូចៗ ទឹកដោះគោស្រស់ អាហារបំប៉ន….)

– ទទួលនូវកម្ដៅថ្ងៃបានគ្រប់គ្រាន់

– ឈប់ពិសាស្រា និងបារី

– ព្យាបាលជំងឺរួមផ្សំ ដែលបណ្តាលឲ្យកំហាប់ឆ្អឹងថយ

– ជៀសវាងការដួល បុក ប៉ះទង្គិច

– ជៀសវាងការប្រើថ្នាំផ្ដេសផ្ដាស (ស្តេរ៉ូអ៊ីត)

បើលោកអ្នកមានបញ្ហាដូចបានរៀបរាប់ខាងលើ សូមលោកអ្នកអញ្ជើញមកពិគ្រោះជាមួយគ្រូពេទ្យឯកទេស នៃមន្ទីរពេទ្យកាល់ម៉ែត ដើម្បីទទួលបាននូវការការពារ និងព្យាបាលដ៏មានប្រសិទ្ធភាព និងប្រកបដោយគុណភាព៕

អត្ថបទ៖ រស្មី

សូមចុចអាន៖ រោគសញ្ញា និងការព្យាបាលការរលាកប្រព័ន្ធទឹកមូត្រស្រួចស្រាវ!

Related Topics:សុខភាព