កម្ពុជា ជំរុញឥណ្ឌាពន្លឿនចុះហត្ថលេខា​លើកិច្ចព្រមព្រៀងពាណិជ្ជកម្ម​សេរីរវាងប្រទេសទាំងពីរ

កម្ពុជា បានជំរុញភាគីឥណ្ឌាពន្លឿនចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ ព្រមទាំងបញ្ចប់នូវសន្ធិសញ្ញាវិនិយោគទ្វេភាគីឱ្យបានឆាប់។

ការជំរុញនេះ ធ្វើឡើងនៅក្នុងកិច្ចប្រជុំតាមរយៈ Video conference រវាងសម្តេចតេជោ ហ៊ុន សែន និងនាយករដ្ឋមន្រ្តីឥណ្ឌា លោក ណារិនដ្រា​ ម៉ូឌី កាលពីថ្ងៃទី១៨ ខែឧសភា ឆ្នាំ ២០២២។

សម្តេចតេជោ នាយករដ្ឋមន្រ្តីបានលើកឡើងទៀតថា ទំហំពាណិជ្ជកម្មរវាងប្រទេសទាំងពីរ ថ្វីត្បិតមានការធ្លាក់ចុះនៅសម័យកូវីដ-១៩ក្តី ប៉ុន្តែនៅឆ្នាំ ២០២១ មានការកើនឡើងប្រមាណ ៣០០លានដុល្លារ។ ដោយឡែក ៤ខែដើមឆ្នាំ២០២២នេះ ទំហំពាណិជ្ជកម្មទ្វេភាគីរវាងកម្ពុជានិងឥណ្ឌា សម្រេចបានក្នុងរង្វង់ទឹកប្រាក់ ១៣៩លានដុល្លារហើយ។ ទំហំនេះ បានកើនរហូតដល់៥៩,៧ភាគរយ បើធៀបនឹងរយៈពេលដូចគ្នាកាលឆ្នាំ២០២១។ នេះបើយោងតាមស្ថិតិជញ្ជីងពាណិជ្ជកម្មជាមួយប្រទេសសំខាន់ៗរបស់អគ្គនាយកដ្ឋានគយ និងរដ្ឋាករកម្ពុជា។

ជាការឆ្លើយតប នាយករដ្ឋមន្រ្តីឥណ្ឌា លោក ណារិនដ្រា​ ម៉ូឌី រីករាយដែលឥណ្ឌាអាចជួយកម្ពុជាបាន ជាពិសេសទៅលើការផ្តល់វ៉ាក់សាំង និងកិច្ចសហប្រតិបត្តិការរវាងប្រទេសទាំងពីរ។

គិតមកត្រឹមឆ្នាំ២០២២នេះ កម្ពុជាបានសម្រេចកិច្ចព្រមព្រៀងពាណិជ្ជកម្មសេរីទ្វេភាគីជាមួយចិន និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប)  ហើយកូរ៉េខាងត្បូងត្រៀមនិងដាក់ប្រកាសក្នុងពេលឆាប់ៗនេះផងដែរ​ ៕