ប្រធានក្រុមការងារចុះមូលដ្ឋានស្រុកទ្រាំង ធ្វើយុទ្ធនាការឃោសនារកសម្លេងឆ្នោតនៅថ្ងៃចុងក្រោយ

ក្រុមការងារគណបក្សប្រជាជនកម្ពុជា ចុះមូលដ្ឋានស្រុកទ្រាំង ដឹកនាំដោយលោក សុខ ផេង ប្រធានក្រុមការងារចុះមូលដ្ឋានស្រុកទ្រាំង បានធ្វើយុទ្ធនាការឃោសនាបោះឆ្នោតដែលជាថ្ងៃចុងក្រោយ ក្នុងការស្វែងរកសម្លេងគាំទ្រពីបងប្អូនប្រជាពលរដ្ឋនៅតាមមូលដ្ឋានសម្រាប់ការបោះឆ្នោតក្រុមប្រឹក្សាឃុំ សង្កាត់ ដែលនឹងមកដល់នៅប៉ុន្មានថ្ងៃខាងមុខនេះ។

យុទ្ធនាការឃោសនារកសម្លេងឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅមូលដ្ឋានស្រុកទ្រាំង ព្រឹកថ្ងៃទី០៣ ខែមិថុនា ឆ្នាំ២០២២នេះ ផងដែរ ក្រៅតែពីថ្នាក់ដឹកនាំចុះមូលដ្ឋានស្រុក ក៏មានសកម្មជនគណបក្សប្រជាជនកម្ពុជា ជាច្រើនរូបបានចូលរួមដង្ហែក្បួនប្រកបដោយទឹកមុខរីករាយ ជាពិសេសមានការចូលរួមអបអរសាទរពីបងប្អូនប្រជាពលរដ្ឋតាមបណ្តាភូមិនានា ដោយបានស្រែកស្វាគមន៍គណបក្សប្រជាជនកម្ពុជាគ្រប់ៗគ្នា។ ជាពិសេសសម្លេងស្រែកពីប្រជាពលរដ្ឋតាមខ្នងផ្ទះ ( អរគុណសន្តិភាព អរគុណសម្តេចតេជោ ជយោគណបក្សប្រជាជនកម្ពុជា ដ៏រុងរឿង) ក៏បានសបញ្ជាក់ថា គណបក្សប្រជាជនកម្ពុជា ដែលដឹកនាំដោយសម្តេចអគ្គមហាសេនាបតិតេជោ ហ៊ុន សែន នឹងឈ្នះឆ្នោតសម្រាប់អាណត្តិក្រុមប្រឹក្សាឃុំ សង្កាត់ សម្រាប់អាណត្តិនេះ ហើយនឹងឈ្នះរាល់ការបោះឆ្នោតលើកៗក្រោយទៀត៕

អត្ថបទ៖ វីរៈ