វីដេអូស្ដែងៗ ក្មេងប្រុស អាមេរិក អាយុ ១២ ឆ្នាំភ្ជង់កាំភ្លើង និងបាញ់គំរាមប្លន់ យកលុយរាប់ពាន់ដុល្លារ

ប៉ូលិសបាននិយាយថា ក្មេងប្រុសអាយុ ១២ ឆ្នាំម្នាក់បានបាញ់ព្រមានអ្នកគិតលុយ នៅពេលដែលរូបគេចូលប្លន់ស្ថានីយ៍ប្រេងឥន្ធនៈមួយកន្លែងនៅទីក្រុង Hartford រដ្ឋ Michigan សហរដ្ឋអាមេរិក ។

ក្មេងប្រុសដែលមិនត្រូវបានបញ្ចេញឈ្មោះ ដោយសារតែគាត់ជាអនីតិជនបានយកកាំភ្លើងខ្លីភ្ជង់ទៅកាន់អ្នកគិតលុយ និងបាញ់ឡើងលើពិដានស្ថានីយ៍ប្រេងឥន្ធនៈ ហើយបានប្រាប់ឲ្យអ្នកគិតលុយឲ្យយកលុយដាក់ចូលកាបូបស្ពាយពណ៌ខ្មៅរបស់គាត់ ។

យោងតាមសារព័ត៌មាន CBS បានឲ្យដឹងថា ក្រោយមកក្មេងប្រុសនេះបានរត់គេចខ្លួនជាមួយនឹងប្រាក់រាប់ពាន់ដុល្លារ ប៉ុន្តែភ្លាមៗនោះត្រូវបានចាប់ខ្លួន ហើយប៉ូលិសបានរឹបអូសទាំងកាំភ្លើង និងលុយដែលលួចបាន ។

CBS បានរាយការណ៍ទៀតថា ក្មេងប្រុសដែលត្រូវបានគេកំណត់អត្តសញ្ញាណថាជាសិស្សនៅសាលា Hartford Middle School បានប្រាប់ប៉ូលិសថា រូបគេបានយកកាំភ្លើងចេញពីទូចាក់សោរនៅក្នុងផ្ទះរបស់គាត់ ។

បន្ទាប់ពីចាប់ខ្លួនហើយ ក្មេងប្រុសនេះត្រូវបានគេនាំទៅមជ្ឈមណ្ឌលអនីតិជននៃតំបន់ Allegan ហើយដាក់នៅឯតុលាការអនីតិជនក្នុងទីក្រុង Paw Paw រដ្ឋ Michigan ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ អាមេរិក មានការបាញ់សម្លាប់មនុស្សជាង ៧០០នាក់ ត្រឹម២សប្តាហ៍ ក្រោយហេតុការណ៍នៅ តិចសាស់