ព័ត៌មានជាតិ

កម្ពុជាថ្លែងអំណរគុណ រដ្ឋាភិបាល និងប្រជាជនអូស្ត្រាលី ដែលជួយគាំទ្រវិស័យសកម្មភាពមីនមនុស្សធម៌នៅកម្ពុជាតាំងពីឆ្នាំ១៩៩៤មក

បានផុស

៤ years មុន

នៅ

ថ្ងៃចន្ទ ១៣ មិថុនា ២០២២

ដោយ

រសៀលថ្ងៃទី១៣ ខែមិថុនា ឆ្នាំ២០២២ នៅទីស្នាក់ការអាជ្ញាធរមីន លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានទទួលជួបពិភាក្សា ការងារជាមួយ លោកស្រី Kathryn Campbell រដ្ឋលេខាធិការនៃក្រសួងការបរទេស និងពាណិជ្ជកម្មអូស្ត្រាលី ស្តីពីភាពជាដៃគូ និង កិច្ចសហប្រតិបត្តិការ ពាក់ព័ន្ធ នឹងវិស័យសកម្មភាពមីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមរាជរដ្ឋាភិបាលកម្ពុជា លោកទេសរដ្ឋមន្ត្រី លី ធុជ បានថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជនអូស្ត្រាលី ដែលជួយគាំទ្រដល់វិស័យសកម្មភាពមីនមនុស្សធម៌នៅកម្ពុជាតាំងពីឆ្នាំ១៩៩៤ និងក្រោយមកបានចូលរួមគាំទ្រដល់គម្រោងបោសសម្អាតមីនចាប់តាំងពីឆ្នាំ២០០៦ ដោយផ្តល់ដីមានសុវត្ថិភាព និងបានជួយសង្គ្រោះដល់អាយុជីវិតបានរាប់លាននាក់ឲ្យរួចផុតពីគ្រោះថ្នាក់ដោយមីន និងសំណល់ជាតិផ្ទុះពីសង្គ្រាម។

លោកទេសរដ្ឋមន្ត្រីលី ធុជបានលើកឡើងអំពី សមិទ្ធផលរយៈពេល ៣០ឆ្នាំ ចាប់តាំងពីឆ្នាំ ១៩៩២ នៃការចាប់ផ្តើមកម្មវិធីសកម្មភាពមីនមនុស្សធម៌នៅកម្ពុជា ក្រោមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងមានការចូលរួមរបស់ប្រទេសម្ចាស់ និងដៃគូអភិវឌ្ឍន៍ ក្នុងនោះប្រទេសអូស្ត្រាលី គឺជាដៃគូដ៏លេចធ្លោ និងរឹងមាំសម្រាប់វិស័យសកម្មភាពមីននៅកម្ពុជា។

លោកបន្តទៀតថា ជាមួយនឹងសមិទ្ធផលទាំងនេះ រាជរដ្ឋាភិបាលបានដាក់ចេញនូវចក្ខុវិស័យយ៉ាងច្បាស់លាស់ដោយកំណត់គោលដៅកម្ពុជាគ្មានមីនឆ្នាំ២០២៥។ លោកបន្តទៀតថា ដើម្បី សម្រេចគោលដៅនេះ កម្ពុជា ត្រូវ ការបោសសម្អាតមីនលើផ្ទៃដីប្រមាណ ១៦០គីឡូម៉ែត្រក្រឡា ក្នុងមួយឆ្នាំ ប៉ុន្តែបច្ចុប្បន្ននេះ កម្ពុជា អាចមានលទ្ធភាពបោសសម្អាតបានត្រឹមតែពី ៩០-១០០គីឡូម៉ែត្រក្រឡា ប៉ុណ្ណោះ។

ក្នុងនាមរាជរដ្ឋាភិបាល និងប្រជាជនកម្ពុជា លោកទេសរដ្ឋមន្ត្រី បានស្នើសុំឲ្យរដ្ឋាភិបាល អូស្ត្រាលី បន្តជួយគាំទ្រដល់ការងារបោសសម្អាតមីនរហូតដល់កម្ទេចគ្រាប់មីនចុងក្រោយនៅកម្ពុជា ទោះបីកម្ពុជាមិនបានសម្រេចគោលដៅឆ្នាំ២០២៥ ក៏ដោយ។

លោកស្រី Kathryn Campbell បានកោតសរសើរ និងវាយតម្លៃខ្ពស់ចំពោះ ការសម្រេចបាននៃការងារបោសសម្អាតមីននៅកម្ពុជា ហើយលោកស្រីនឹងបន្តគាំទ្រដល់ការងារបោសសម្អាតមីននៅកម្ពុជា ព្រមទាំងពាំនាំសំណើសុំ និងលទ្ធផលនៃកិច្ចប្រជុំជម្រាបប្រាប់រដ្ឋាភិបាលអូស្ត្រាលី ផងដែរ៕