នគរបាលក្រុងភ្នំពេញ កោះហៅមនុស្ស៣នាក់មកអប់រំ ក្រោយផលិតវីដេអូនិយាយអាសអាភាស

នៅថ្ងៃទី២៦ ខែកក្កដា ឆ្នាំ២០២២នេះ ការិយាល័យប្រឆាំងបទល្មើសបច្ចេកវិទ្យាបានសហការជាមួយមន្ត្រីប្រឆាំងការជួញដូរមនុស្ស និងយេនឌ័រ បានកោះហៅមនុស្សចំនួន ៣នាក់ ឲ្យបង្ហាញខ្លួននៅស្នងការដ្ឋាន នគរបាលរាជធានីភ្នំពេញ ក្រោយផលិតវីដេអូ ដោយប្រើពាក្យអាសអាភាសនៅលើបណ្ដាញសង្គមហ្វេសប៊ុសប៊ុក។

កាលពីថ្ងៃទី២៣ ខែកក្កដា ឆ្នាំ២០២២ មានគណនីហ្វេសប៊ុកមួយ មានឈ្មោះថា Kaa Offical បានបង្ហោះឃ្លីបវីដេអូមួយ មានចំណងជើងថា «វិប្បដិសារី» នៅលើសណ្តាញសង្គមហ្វេសប៊ុក។ វីដេអូនេះ គឺនិយាយទាក់ទងទៅនឹងសកម្មភាពបុរស ២នាក់ សម្តែងសកម្មភាពដោយប្រើពាក្យពេជន៍ អសីលធម៌ អាសអាភាស ដែលធ្វើឲ្យប៉ះពាល់ធ្ងន់ធ្ងរដល់សីលធម៌សង្គម ហើយក៏ផ្ទុះការប្រតិកម្មពីសំណាក់អ្នកប្រើប្រាស់បណ្តាញសង្គម។

ក្រោយបានឃើញបែបនេះ ក្រុមការងារព័ត៌មាន និងប្រតិកម្មហ័សនៃស្នងការដ្ឋាននគរបាលរាជធានី ភ្នំពេញ ដោយអនុវត្តតាមបទបញ្ជារបស់លោក ស ថេត អគ្គស្នងការរង និងជាស្នងការនគរបាលរាជធានី ភ្នំពេញ បានកោះហៅបុគ្គលទាំង ៣នាក់នេះ ឲ្យចូលខ្លួនមកធ្វើកិច្ចសន្យា និងសុំទោសជាសាធារណ: ចំពោះកំហុសរបស់ពួកគេ។

បុគ្កលទាំង ៣នាក់ ដែលប្រព្រឹត្តទង្វើមិនសមរម្យ ហើយនាំឲ្យប៉ះពាល់ដល់សីលធម៌សង្គម រួមមាន៖ ១- ឈ្មោះ វណ្ណា ឌី ភេទប្រុស អាយុ៦០ឆ្នាំ មុខរបរសិល្បៈករ (តួសម្តែង) ២- ឈ្មោះ ងួន ពិសី ភេទប្រុស អាយុ១៨ មុខរបរ សិល្បៈករ  ៣- ឈ្មោះ ពៅ ដេវីដ ភេទប្រុស អាយុ២៩ឆ្នាំ មុខរបរ អ្នកគ្រប់គ្រងផេក៕

ដោយ៖ ធឿន វ៉ាន់សុង