រដ្ឋាភិបាលស្រមោល មីយ៉ាន់ម៉ា ព្រមានអាជីវកម្មបរទេស កុំឱ្យរកស៊ីជាមួយមេដឹកនាំយោធា

ប្រភពព័ត៌មានបានឱ្យដឹងថា រដ្ឋាភិបាលស្រមោលរបស់មីយ៉ាន់ម៉ា (NUG) បានចេញការព្រមានដល់ក្រុមហ៊ុនចិន និងសិង្ហបុរី ដែលវិនិយោគជាមួយយោធាមីយ៉ាន់ម៉ាចំនួន ៨ក្រុមហ៊ុន ឱ្យបញ្ឈប់ប្រតិបត្តិការរបស់ខ្លួនជាបន្ទាន់។ ទន្ទឹមគ្នានេះ កងកម្លាំងប្រដាប់អាវុធការពារប្រជាជនក៏បានបើកការវាយប្រហារលើរោងចក្រថាមពលនៅ Magway និងបានសម្រុកចូលលុកលុយការិយាល័យក្រុមហ៊ុនទូរគមនាគមន៍ Mytel របស់មេដឹកនាំផ្តាច់ការយោធា។

ការព្រមាននេះបានធ្វើឡើងកាលពីថ្ងៃទី៥ ខែសីហាកន្លងទៅ ក្រុមហ៊ុនចំនួន ៨ដែលបានលើកឡើងនេះ គឺក្រុមហ៊ុនចំនួន ៥គ្រប់គ្រងដោយសិង្ហបុរី ក្រុមហ៊ុនបណ្តាក់ទុនរួមគ្នាមានមូលដ្ឋាននៅសិង្ហបុរីចំនួន២ និងក្រុមហ៊ុនចិនចំនួន១។ រដ្ឋាភិបាលស្រមោលនិយាយថា ក្រុមហ៊ុនទាំងនេះ ក្រុមហ៊ុននីមួយៗមានតម្លៃប្រហែល ១ពាន់លានដុល្លារ។ ទោះជាយ៉ាងណាក៏ដោយ សេចក្តីថ្លែងការណ៍របស់រដ្ឋាភិបាលស្រមោលលើកនេះ ដើម្បីជាការព្រមានទៅកាន់ក្រុមហ៊ុនផ្សេងៗទៀត ដែលត្រូវបានផ្តល់អាជ្ញាប័ណ្ណដោយក្រុមប្រឹក្សាវិនិយោគមីយ៉ាន់ម៉ាផងដែរ។

គណៈកម្មាធិការអ្នកតំណាងសភា (CRPH) ដែលជាស្ថាប័ននីតិប្បញ្ញត្តិនិរទេសធ្លាប់បានប្រកាសថា រាល់ការវិនិយោគទាំងអស់ក្រោយរដ្ឋប្រហារថ្ងៃទី១ ខែកុម្ភៈ ឆ្នាំ២០២១ត្រូវទុកជាមោឃៈ។ សេចក្តីប្រកាសនេះត្រូវបានទទួលការគាំទ្រពីរដ្ឋាភិបាលស្រមោលនៅថ្ងៃទី២១ ខែកក្កដា ឆ្នាំ២០២១ ដោយនិយាយថា ខ្លួននឹងមិនទទួលស្គាល់ការវិនិយោគណាមួយក្រោមការចាត់តាំងដែលគ្រប់គ្រងរបស់របបផ្តាច់ការយោធាឡើយ។ បន្ទាប់មកនៅថ្ងៃទី៣០ ខែសីហា ឆ្នាំ២០២១ គណៈកម្មាធិការអ្នកតំណាងសភា (CRPH) ក៏បានចេញសេចក្តីថ្លែងការណ៍មួយទៀតដោយនិយាយថា ខ្លួននឹងចាត់វិធានការផ្លូវច្បាប់ប្រឆាំងនឹងក្រុមហ៊ុនទាំងអស់ដែលវិនិយោគជាមួយរបបផ្តាច់ការយោធាមីយ៉ាន់ម៉ា៕

ប្រែសម្រួល៖ គង់ សំអាន

ប្រភព៖ prachatai

ចុចអាន៖ ប៉ូលិសថៃឆ្មក់ចាប់ក្រុមថតភាពយន្តអាសអាភាស ពេលកំពុងប្រតិបត្តិការនៅលើគ្រែ