តើបងប្អូន បានស្គាល់រមណីយដ្ឋានថ្មី កែច្នៃបែបបុរាណ នេះហើយ ឬនៅ?

រមណីយដ្ឋានទឹកធ្លាក់ ព្រះអង្គផ្ទុំភ្នំតារាល (ទឹកធ្លាក់អូតាប៉ាង) គឺជារមណីយដ្ឋានធម្មជាតិ និងកែច្នៃ ស្ថិតនៅក្នុងខេត្តព្រះសីហនុ តំបន់នោះមានប្រជាជនរស់នៅប្រមានជាង ២៥០ គ្រួសារ ភាគច្រើនប្រកបរបរធ្វើស្រែចម្ការ។ មហាជនភាគច្រើន មិនទាន់បានទៅទស្សនាទីរមណីយដ្ឋានថ្មីនេះទេ ខណៈទេសចរដែលបានទៅដល់ តែងរីករាយនឹងសម្រស់ធម្មជាតិ ព្រមទាំងចម្លាក់ក្បាច់បុរាណដ៏វិចិត្រ ដោយអ្នកខ្លះបានគិតថា រមណីដ្ឋាននេះត្រូវបានបានរៀបចំតាំងពីសម័យអង្គរថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅ រមណីយដ្ឋាននេះបង្កើតឡើងដោយវិស័យឯកជន ដោយរៀបចំជារបាក់ទឹកធ្លាក់ និងមានចម្លាក់ដាប់ ចេញពីផ្ទាំងថ្មនៅនឹងកន្លែងផ្ទាល់ដោយជាងចម្លាក់ និងរូបមួយចំនួនទៀតនាំយកមករៀបចំដាក់បន្ថែម មានទម្រង់ស្រដៀងទៅនឹងចម្លាក់នៅតាមប្រាសាទបុរាណ ពិសេសស្រដៀងទិដ្ឋភាពនៅបូជណីដ្ឋាន និងរមណីដ្ឋាន ក្បាលស្ពាន និង ភ្នំគូលែន នាខេត្តសៀមរាប។

រមណីយដ្ឋានទឹកធ្លាក់ ព្រះអង្គផ្ទុំភ្នំតារាល មានទីតាំងស្ថិតនៅភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ មានចំងាយប្រមាណជា ៣៤ គីឡូម៉ែត្រពីក្រុងព្រះសីហនុ ដោយធ្វើដំណើរតាមបណ្តោលផ្លូវជាតិលេខ៤ ចន្លោះបង្គោលទី១៩១ និង១៩២។ ពេលមកដល់ភូមិសាស្រ្តខាងលើហើយ ត្រូវបត់ចូលតាមផ្លូវលំប្រមាណ ៥ គីឡូម៉ែត្រ ទើបដល់ទីតាំង។

រមណីយដ្ឋានទឹកធ្លាក់ ព្រះអង្គផ្ទុំភ្នំតារាល កំពុងមានភាពទាក់ទាញភ្ញៀវទេសចរជាតិ និងអន្តរជាតិចូល ទៅលេងកម្សាន្តឥតដាច់ បើទោះជារមណីដ្ឋាននេះកំពុងដំណើរការសាងសង់ក៏ដោយ។ រមណីយដ្ឋាន នេះបានរំលេចជាទិដ្ឋភាពដ៏អស្ចារ្យរួមបញ្ចូលគ្នារវាងធម្មជាតិដ៏ស្រស់ត្រកាល និងចម្លាក់ធ្វើឡើងតាមលំនាំបែបព្រហ្មសាសនា មានរូបព្រះម៉ែ ពស់ និង ព្រះសិវ: តាមលិទ្ធិ ព្រហ្មញ្ញសាសនា សត្វអណ្ដើក រូបគោនិង ដំរីជាដើម៕