អនុប្រធានាធិបតីអាមេរិក ទៅដល់កូរ៉េខាងត្បូង ក្រោយកូរ៉េខាងជើង បាញ់មីស៊ីលបានមួយថ្ងៃ

នៅថ្ងៃព្រស្បតិ៍ទី២៩ខែកញ្ញានេះ អនុប្រធានាធិបតីអាមេរិក លោកស្រី Kamala Harris បានទៅដល់ប្រទេសកូរ៉េខាងត្បូងហើយ ពោលគឺមួយថ្ងៃបន្ទាប់ពីកូរ៉េខាងជើង បាញ់មីស៊ីលផ្លោងរយៈចម្ងាយខ្លីចំនួនពីរគ្រាប់ ចេញពីឆ្នេរសមុទ្រភាគខាងកើតរបស់ខ្លួន។

ការបាញ់បង្ហោះ បានកើតឡើងចំពេលសហរដ្ឋអាមេរិក និងកូរ៉េខាងត្បូង ធ្វើសមយុទ្ធយោធាជើងទឹករួមគ្នានៅក្នុងដែនទឹកជុំវិញឧបទ្វីបកូរ៉េ ខណៈមន្ត្រីកូរ៉េខាងត្បូង និងជប៉ុនបានថ្កោលទោសការបាញ់នោះថាជា ការបង្កហេតុ។

ក្នុងអំឡុងពេលដំណើរទស្សនកិច្ចទៅកាន់ប្រទេសកូរ៉េខាងត្បូង លោកស្រី Harris នឹងធ្វើដំណើរទៅកាន់ព្រំដែន និងតំបន់គ្មានយោធា (DMZ) ដែលពុះចែកកូរ៉េខាងជើង និងខាងត្បូង។

កាលពីថ្ងៃពុធ លោកស្រីបានថ្លែងទៅកាន់ទាហានអាមេរិក នៅឯមូលដ្ឋានយោធាក្នុងប្រទេសជប៉ុន ជាកន្លែងដែលលោកស្រី បានថ្កោលទោសការបាញ់បង្ហោះនាពេលថ្មីៗនេះរបស់ទីក្រុងព្យុងយ៉ាង និងកម្មវិធីអាវុធខុសច្បាប់ដែលគំរាមកំហែងដល់ស្ថិរភាពក្នុងតំបន់។

អាជ្ញាធរកូរ៉េខាងត្បូងបាននិយាយថា មីស៊ីលកាលពីថ្ងៃពុធ ត្រូវបានបាញ់នៅចន្លោះម៉ោង ១៨:១០ នាទីដល់ម៉ោង ១៨:២០ នាទី (ម៉ោងក្នុងស្រុក) ហើយហោះចម្ងាយ ៣៦០គីឡូម៉ែត្រ និងឈានដល់រយៈកម្ពស់ ៣០គីឡូម៉ែត្រ៕

ប្រែសម្រួល៖ Vann Vann

ប្រភព៖ BBC

ចុចអាន៖ កូរ៉េខាងត្បូង បង្ហើបពេលវេលាដែល កូរ៉េខាងជើង ទំនងជាបាញ់នុយក្លេអ៊ែរ