សម្តេចតេជោ ស្នើថៃទិញអង្ករពីកម្ពុជា និងសម្រួលការនាំចូលកសិផលឆ្លងកាត់ព្រំដែន

នៅក្នុងជំនួបពិភាក្សាអំពីកិច្ចសហប្រតិបត្តិការទ្វេភាគីជាមួយនាយករដ្ឋមន្រ្តីថៃ លោក ប្រាយុទ្ធ ច័ន្ទអូចា កាលពីថ្ងៃទី ១០ ខែ វិច្ឆិកា សម្តេចតេជោ ហ៊ុន សែន នាយករដ្ឋកម្ពុជា បានស្នើភាគីថៃជួយទិញអង្ករពីកម្ពុជាបន្ថែមទៀត និងជួយសម្រួល​នីតិវិធីនៃការនាំចូលកសិផលកម្ពុជាឆ្លងព្រំដែនចូលទៅប្រទេសថៃផងដែរ។

ទោះយ៉ាងណា ភាគីទាំងពីរ បានកត់សម្គាល់ដោយពេញចិត្តចំពោះកំណើននៃការផ្លាស់ប្តូរពាណិជ្ជកម្មទ្វេភាគី ចំពេលនៃបញ្ហាប្រឈមនានាបង្ករឡើងដោយជំងឺកូវីដ-១៩ និងបានពិភាក្សាអំពីវិធានការជាក់ស្តែង ដើម្បីជំរុញ​បន្ថែមទៀតនូវទំហំនៃការផ្លាស់ប្តូរនេះឱ្យកើនដល់គោលដៅចំនួន ១៥ប៊ីលានដុល្លារ នៅក្នុងរយៈពេល ២ឆ្នាំ។

ដើម្បីជំរុញពាណិជ្ជកម្មតាមព្រំដែន និងទំនាក់ទំនងរវាងប្រជាជន និងប្រជាជន នាយករដ្ឋមន្រ្តីនៃប្រទេសទាំងពីរ បានឯកភាពប្រគល់ភារកិច្ចដល់អាជ្ញាធរពាក់ព័ន្ធនៃប្រទេសទាំងពីរ ដើម្បីពន្លឿនការបើកដំណើរការច្រកទ្វារ​អន្តរជាតិស្ទឹងបត់-បានណងអៀន និងការបើកដំណើរការ«ស្ពានមិត្តភាព» ឱ្យបានឆាប់ ហើយនឹងអនុវត្តកិច្ចព្រម​ព្រៀងដែលសម្រេចបាន ក្នុងកិច្ចប្រជុំអភិបាលខេត្តជាប់ព្រំដែនកម្ពុជា-ថៃ នាពេលថ្មីៗនេះ ដើម្បីជំរុញអភិវឌ្ឍតំបន់​តាមព្រំដែន។

កម្ពុជា ថៃ ក៏បានសង្កត់ធ្ងន់លើសារៈសំខាន់នៃការពង្រឹងកិច្ចសហប្រតិបត្តិការលើវិស័យអប់រំ ការអភិវឌ្ឍធនធានមនុស្ស វិស័យការពារជាតិ និងសន្តិសុខ ទេសចរណ៍ ការតភ្ជាប់ផ្លូវដែក ថាមពលស្អាត ការប្រយុទ្ធប្រឆាំងឧក្រិដ្ឋកម្មឆ្លងដែន ជាដើម។

លោក ប្រាយុទ្ធ ច័ន្ទអូចា បានវាយតម្លៃខ្ពស់ចំពោះទំនាក់ទំនង និងកិច្ចសហការដ៏ល្អលើគ្រប់វិស័យដែលកំពុង​មាននាពេលបច្ចុប្បន្ន រវាងប្រទេសទាំងពីរ ដែលឈរលើស្មារតីជាអ្នកជិតខាងល្អ មិត្តភាពជាប្រពៃណី និងការជឿជាក់​គ្នាទៅវិញទៅមក។

នាយករដ្ឋមន្រ្តីទាំងពីរ ក៏បានសម្តែងការពេញចិត្តចំពោះវឌ្ឍនភាពដ៏គួរឱ្យកត់សម្គាល់នៃកិច្ចសហប្រតិបត្តិការគ្រប់​ជ្រុងជ្រោយក្នុងរយៈពេលប៉ុន្មានឆ្នាំចុងក្រោយនេះ និងបានឯកភាពគ្នាក្នុងការពង្រីកធ្វើឱ្យស៊ីជម្រៅបន្ថែមទៀត នូវទំនាក់ទំនងដ៏ជិតស្និទ្ធ៕