​ក្រសួងការបរទេសអ៊ីរ៉ង់៖ អ៊ីរ៉ង់​លែងខ្វល់​អំពីការចរចាជាមួយ អាមេរិក

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បានលើកឡើងថា សាធារណរដ្ឋអ៊ីស្លាមអ៊ីរ៉ង់ គ្មានផែនការបន្តការចរចាជាមួយអាមេរិកឡើងវិញនោះទេ ចំពេលមានការប្រឈមមុខដាក់គ្នាតាមផ្លូវយោធារវាងភាគីទាំងពីរ ក្នុងតំបន់អាស៊ីខាងលិច (មជ្ឈិមបូព៌ា)។ នេះបើយោងតាមការចុះផ្សាយពីប្រព័ន្ធផ្សព្វផ្សាយរដ្ឋអ៊ីរ៉ង់ Press TV។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Baghaei បានអះអាងថា បច្ចុប្បន្នទីក្រុងតេហេរ៉ង់ លែងចាត់ទុកខ្លួនឯងថាមានកាតព្វកិច្ចត្រូវអនុវត្តតាមអនុស្សរណៈនៃការយោគយល់គ្នា (MoU) ដែលបានចុះហត្ថលេខាជាមួយទីក្រុងវ៉ាស៊ីនតោន ក្នុងគោលបំណងបញ្ចប់ជម្លោះនៅក្នុងតំបន់នោះទៀតហើយ។

លោក Baghaei បានគូសបញ្ជាក់ទៀតថា អ៊ីរ៉ង់នឹងមិនត្រឡប់ទៅរកតុចរចាវិញឡើយ ខណៈពេលដែលអាមេរិកនៅតែបន្តរំលោភលើការប្តេជ្ញាចិត្តរបស់ខ្លួនក្រោមការព្រមព្រៀង MoU កាលពីថ្ងៃទី១៧ ខែមិថុនា។ លោកក៏បានឆ្លើយតបទៅនឹងការអះអាងរបស់អាមេរិកដែលថា ប្រតិបត្តិការយោធារបស់ខ្លួនប្រឆាំងនឹងអ៊ីរ៉ង់ នឹងបង្ខំឲ្យទីក្រុងតេហេរ៉ង់ត្រឡប់មកចរចាវិញនោះថា «បច្ចុប្បន្នយើងគ្មានផែនការសម្រាប់ការចរចាណាមួយឡើយ ហើយយើងកំពុងផ្តោតលើការការពារខ្លួន»។

អ្នកនាំពាក្យរូបនេះបានបន្តថា អ៊ីរ៉ង់ជឿជាក់ថា អាមេរិកបានបរាជ័យក្នុងការគោរពកាតព្វកិច្ចរបស់ខ្លួន ក្រោមការព្រមព្រៀងនេះតាំងពីដំបូងមកម្ល៉េះ ដែលវាបានរុញច្រានឲ្យទីក្រុងតេហេរ៉ង់ត្រូវពិចារណាឡើងវិញអំពីការប្តេជ្ញាចិត្តរបស់ខ្លួនដូចគ្នា។

មិនតែប៉ុណ្ណោះ លោកបានសង្កត់ធ្ងន់ថា «MOU គឺជាសំណុំនៃការប្តេជ្ញាចិត្តទៅវិញទៅមក ហើយក្នុងករណីមានការរំលោភបំពានពីភាគីម្ខាងទៀត យើងក៏នឹងផ្អាកការបំពេញកាតព្វកិច្ចរបស់យើងដូចគ្នា។ នេះជាគោលការណ៍ ហើយផ្លូវមួយនេះនឹងត្រូវអនុវត្តតាមចាប់ពីពេលនេះតទៅ។ ភាគីម្ខាងទៀត (អាមេរិក) បានបង្ហាញពីចេតនាមិនល្អ និងការក្បត់ពាក្យសន្យាចាប់តាំងពីប្រការដំបូងបង្អស់នៃ MoU មកម៉្លេះ»។

ការលើកឡើងរបស់លោក ធ្វើឡើងចំពេលដែលអាមេរិកនៅតែបន្តការវាយប្រហារតាមផ្លូវយោធាលើតំបន់ឆ្នេរភាគខាងត្បូងនៃប្រទេសអ៊ីរ៉ង់។ ទីក្រុងវ៉ាស៊ីនតោនបាននិយាយថា ប្រតិបត្តិការទាំងនេះមានគោលបំណងកាត់បន្ថយសមត្ថភាពយោធារបស់អ៊ីរ៉ង់ ដែលខ្លួនចោទប្រកាន់ថាអាចនឹងត្រូវប្រើប្រាស់ដើម្បីគំរាមកំហែងដល់នាវាពាណិជ្ជកម្មនៅក្នុងច្រកសមុទ្រ Hormuz។

ទោះជាយ៉ាងណា អ៊ីរ៉ង់បានច្រានចោលការចោទប្រកាន់ទាំងនោះ ដោយរក្សាជំហរថាការទទួលខុសត្រូវលើការគ្រប់គ្រងការធ្វើដំណើរឆ្លងកាត់ច្រក Hormuz ត្រូវបានប្រគល់ជូនទីក្រុងតេហេរ៉ង់ ក្រោមប្រការ៥ នៃកិច្ចព្រមព្រៀង MoU ដែលមាន ១៤ចំណុចរវាងប្រទេសទាំងពីរ។

គួរជម្រាបថា ភាពតានតឹងរវាងទីក្រុងវ៉ាស៊ីនតោន និងទីក្រុងតេហេរ៉ង់ បានកើនឡើងយ៉ាងខ្លាំងក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីប្រតិបត្តិការយោធារបស់អាមេរិកបានកំណត់គោលដៅលើហេដ្ឋារចនាសម្ព័ន្ធ និងទ្រព្យសម្បត្តិសមុទ្ររបស់អ៊ីរ៉ង់ ខណៈដែលអ៊ីរ៉ង់ក៏បានបើកការវាយប្រហារសងសឹកលើមូលដ្ឋានទ័ពអាមេរិកនៅក្នុងតំបន់ផងដែរ៕

អត្ថបទ ៖ សាង ស្រីល័ក្ខ

​​​ក្នុងជម្លោះ​ដ៏កក្រើក​ជាមួយអាមេរិក លោក Ghalibaf ថា គ្មាន​ហេតុផល​អនុវត្ត MoU បើគ្មានផលចំណេញ​សម្រាប់​អ៊ីរ៉ង់​