ព័ត៌មានជាតិ
ពលរដ្ឋរិះគន់រីសតមួយកន្លែងចាក់ដីបំពានចូលស្ទឹងសង្កែ តែអាជ្ញាធរថាធ្វើជើងទេរ
ប្រជាពលរដ្ឋជាច្រើនបានរិះគន់ទៅលើសំណង់រីសតមួយកន្លែងដែលបានចាក់ដីបំពានលើដីចំណីស្ទឹងសង្កែ ដែលផ្ទុយពីច្បាប់របស់រាជរដ្ឋាភិបាលហាមឃាត់ដាច់ខាតការសាងសង់បំពានលើដីចំណីព្រែក បឹង ស្ទឹង ទន្លេ។
ទីតាំងសំណង់រីសតនេះ ស្តិតនៅប្របមាត់ស្ទឹងសង្កែ ត្រើយខាងកើត ក្នុងភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ដោយបានប្រើប្រាស់គ្រឿងចក្រកាយ និងចាក់អាចម៍ដីបន្ថែមបំពានទៅលើមាត់ស្ទឹងសង្កែ ក្រោមលេសថា ចាក់ធ្វើជើងទេរ ដើម្បីកុំឱ្យបាក់ច្រាំងស្ទឹង។
ប្រជាពលរដ្ឋដែលរស់នៅក្បែទីតាំងនោះបាននិយាយថា ធាតុពិត ដីច្រាំងគឺនៅខាងលើ ក្បែររីសតប៉ុន្តែម្ចាស់ទីតាំងនេះបានចាក់ថ្ម នៅជាន់ខាងក្រោម (ដីក្នុងស្ទឹង) ហើយបានចាក់ដីបំពេញបន្ថែមមួយជាន់ក្រោមទៀត ដើម្បីទប់ដីខាងលើកុំឱ្យបាក់ មិនត្រឹមតែប៉ុណ្ណឹងទេ គេបានប្រើប្រាស់គ្រឿងចក្រកាយដីទប់ប៉ែកខាងលើចូលជិតដល់កណ្តាលស្ទឹង ដើម្បីបញ្ចៀសមុខទឹកកុំឱ្យហូរច្រោះចូលទីតាំងរបស់ខ្លួន សកម្មភាពនេះបានធ្វើឱ្យប្រជាពលរដ្ឋដែលរស់នៅខាងលិចស្ទឹង សម្ដែងនូវការមិនពេញចិត្តទាល់តែសោះ ព្រោះដោយសារតែការបង្វែរទិសដៅទឹកឱ្យហូរបុកទៅខាងលិចវិញ វាជាបញ្ហាមួយបង្កឱ្យបាក់ច្រាំងស្ទឹងនាពេលអនាគត។
ជុំវិញបញ្ហាទីតាំងរបស់រីសតខាងលើនេះ លោក សេក ផានិត ហៅបាវ មេឃុំអូរដំបង១ បាននិយាយថា រឿងនេះលោកមិនបានដឹងឱ្យសុីជម្រៅនោះទេ សុំឱ្យសួរទៅថ្នាក់លើទៅ។
លោកឧត្តមសេនីយ៍ត្រី មៀន ឡាយ ស្នងការរង ទទួលផែនសន្តិសុខ ដែលជាអ្នកមើលការខុសត្រូវនៅក្នុងទីតាំងនេះ បានបញ្ជាក់ថា ការចាក់ដីលើមាត់ច្រាំងនេះ គឺសម្រាប់ធ្វើជើងទេរកុំឱ្យបាក់តែប៉ុណ្ណោះ ហើយការស្ថាបនាជើងទេរនេះ មិនមែនធ្វើតែកន្លែងរីសតប៉ុណ្ណោះទេ គឺត្រូវធ្វើតាមចណ្តោយដងស្ទឹងសង្កែទៅប៉ែកខាងក្រោមរហូតដល់ក្បាលស្ពានវត្តគរឯណោះ បើគិតជាចម្ងាយជិត២គីឡូម៉ែត្រ ហើយទីតាំងខាងលើនេះជារបស់លោក កែវ បេងវឌ្ឍន៍ អគ្គនាយក នៃអគ្គនាយកដ្ឋាន ថវិកាថ្នាក់ក្រោមជាតិ របស់ក្រសួងសេដ្ឋកិច្ច និងហិរញ្ញវត្ថុ។
ជុំវិញការបកស្រាយបែបនេះ លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្ត ក៏ធ្លាប់បានអះអាងប្រាប់កម្ពុជាថ្មីថា ការស្ថាបនាច្រាំងស្ទឹងសង្កែ ប៉ែកខាងលើស្ពានវត្តគរ គឺក្នុងគម្រោងមានតែប្រវែង ១៥០ ម៉ែត្រនៃក្បាលស្ពានវត្តគរតែប៉ុណ្ណោះ គឺមិនមានស្ថាបនាកន្លែងណាផ្សេងទៀតឡើយ។
កម្ពុជាថ្មី បានព្យាយាមជួបតាមរយៈទូរស័ព្ទ ជាមួយលោក ឡុង ផលគុណ ប្រធានមន្ទីរធនធានទឹក និងឧត្តុនិយម ដែរដើម្បីសុំការបំភ្លឺជុំវិញការចាក់ដីចូលក្នុងស្ទឹងសង្កែ តែលោកមិនទទួលទូរស័ព្ទ។
ប្រភពមួយចំនួនបានលើកឡើងថា វាគឺជាការត្រូវរ៉ូវគ្នាជាមួយមន្ទីរជំនាញ ទើបបានជាគ្មានការរារាំងទាល់តែសោះ ហើយរហូតមកទល់និងពេលនេះ គឺដីនៅតែស្ថិតនៅក្នុងស្ទឹងសង្កែដដែលដោយគ្មានការកាយចេញទាល់តែសោះ៕
អត្ថបទ៖ សោ និយមរ័ត្ន
-
ជីវិតកម្សាន្ដ៤ ថ្ងៃ ago
ពូ ណុយ និង យ៉ែម ស្រីពេជ្រ ត្រៀមចូលរោងការដើមខែក្រោយ
-
សេចក្ដីជូនដំណឹង២ ថ្ងៃ ago
ក្រុមហ៊ុន ហនុមាន ប៊ែវើរីជីស បោះជំហានឆ្ពោះទៅកាន់វិសាលភាពអន្តរជាតិជាមួយម្ចាស់ជើងឯកប្រដាល់ពិភពលោក ម៉ានី ប៉ាគីអាវ!
-
ព័ត៌មានជាតិ១៤ ម៉ោង ago
លោក សុខ ធា ត្រូវបានប្រកាសចូលកាន់តំណែងជានាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ
-
ព័ត៌មានអន្ដរជាតិ៥ ថ្ងៃ ago
មូលហេតុ ៣ ដែលអធិរាជ ឈានឡុង នៃរាជវង្ស Qing បញ្ជាឲ្យកាត់ក្បាលគ្រូទាយល្បីម្នាក់
-
ព័ត៌មានជាតិ៣ ថ្ងៃ ago
Breaking News! ព្រែកជីកហ្វូណនតេជោ នឹងបើកការដ្ឋានសាងសង់ផ្លូវការនៅ ខែសីហា
-
ព័ត៌មានជាតិ២ ថ្ងៃ ago
បង្កើតផ្លូវថ្មីតភ្ជាប់ពីផ្លូវជាតិលេខ១ រហូតដល់គល់ស្ពានព្រែកប្រា-ចាក់អង្រែ
-
សេដ្ឋកិច្ច៥ ថ្ងៃ ago
គម្រោងព្រែកជីកហ្វូណនតេជោ គ្រោងបើកការដ្ឋានសាងសង់ឆាប់ៗ
-
សន្តិសុខសង្គម៤ ថ្ងៃ ago
រថយន្ដពាក់ស្លាកលេខនគរបាល បាញ់ប្រហារលើរថយន្ដPriusមួយគ្រឿង ខណៈស៊ីផ្លេសុំផ្លូវ