អតីតមន្រ្តីរាជការចូលនិវត្តន៍ អាចទទួលបានរបបថែទំាសុខភាពពេញ​មួយជីវិតពី បសស

អតីតមន្រ្តីរាជការដែលចូលនិវត្តន៍ អាចធ្វើបណ្ណសមាជិកបេឡាជាតិសន្តិសុខសង្គម (បសស) ដើម្បីទទួល​បានរបបថែទាំសុខភាពពេញមួយជីវិត។

លោក សុខ បូរ៉ា ប្រធាននាយកដ្ឋានបុគ្គលិក នៃបេឡាជាតិសន្តិសុខសង្គម (បសស) បានលើកឡើងថា អតីតមន្រ្តីរាជការពេលចូលនិវត្តន៍ ក៏មានបណ្ណសមាជិក បសស ដែរ។ ប៉ុន្តែអតីតមន្រ្តីរាជការចូលនិវត្តន៍មួយចំនួន មិនទាន់មានបណ្ណសមាជិកនៅឡើយទេ។ លោកជំរុញឱ្យអតីតមន្រ្តីទាំងអស់ ទៅធ្វើបណ្ណសមាជិក ដើម្បីទទួល​បានរបបថែទាំសុខភាពពេញមួយជីវិត ដោយមិនអស់ប្រាក់ ហើយការធ្វើបណ្ណនេះ មិនអស់ថវិកានោះទេ។

បើតាមលោក សុខ បូរ៉ា បណ្ណសមាជិក បសស មានបីរបបគឺ គ្រោះថ្នាក់ការងារ ថែទាំសុខភាព និងសោធន​(របបចូលនិវត្តន៍)។

សូមបញ្ជាក់ថា មន្រ្តីរាជការ និងអតីតមន្រ្តីរាជការ មានរបបថែទាំសុខភាព តាំងពីឆ្នាំ ២០១៨មកម្លេះ។ ប៉ុន្តែអតីតមន្រ្តីរាជការមួយចំនួន មិនបានដឹងថា បណ្ណសមាជិក បសស នៅមានសុពលភាពអាចប្រើប្រាស់បាន នៅពេលដែលពួកគាត់ចូលនិវត្តន៍។ ដូច្នេះទើបមន្រ្តីជាន់ខ្ពស់ បេឡាជាតិសន្តិសុខសង្គម ជូនដំណឹងដល់អតីត​មន្រ្តីទាំងអស់ អញ្ជើញធ្វើបណ្ណសមាជិក ដើម្បីទទួលបានអត្ថប្រយោជន៍ថែទាំសុខភាព ដោយមិនអស់ថវិកា អស់មួយជីវិត៕