ខឹងម្ដាយមិនទិញម៉ូតូឲ្យមុនថ្ងៃចូលឆ្នាំ កូនដុតផ្ទះឆេះខ្ទេច

កម្លាំងនគរបាលស្រុកគងពិសី បានឃាត់ខ្លួនយុវជនម្នាក់យកទៅអនុវត្តតាមនិតិវិធីច្បាប់ បន្ទាប់ពីដុតផ្ទះខ្លួនឯងឆេះខ្ទេចទាំងស្រុងដោយសារខឹងម្ដាយមិនបំពេញបំណងទិញម៉ូតូឲ្យមុនថ្ងៃចូលឆ្នាំខ្មែរ។ ការឃាត់ខ្លួននេះបានធ្វើឡើងកាលពីថ្ងៃអាទិត្យ ទី៩ ខែមេសា ឆ្នាំ២០២៣ នៅចំណុចភូមិចាស់ ឃុំពេជមុនី ស្រុកគងពិសី​ ខេត្តកំពង់​ស្ពឺ។

យោងតាមរបាយការណ៍របស់ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា ជនសង្ស័យដែលឃាត់ខ្លួនមានឈ្មោះ ខឿន សុភីន ភេទប្រុ​ស អាយុ២១ឆ្នាំ ត្រូវជាកូនប​ង្កើ​តរបស់ជនរងគ្រោះឈ្មោះ ឆឹង លីម ភេទស្រី អាយុ៤៣ឆ្នាំ ដែលត្រូវភ្លើងឆេះផ្ទះរស់នៅកន្លែងកើតហេតុ។ ចំណែកផ្ទះដែលត្រូវអគ្គិភ័យឆាបឆេះនោះមានទំហំ៨×៩ ម៉ែត្រ ធ្វើអំពីឈើប្រក់ក្បឿង ជញ្ចាំងក្ដា​ ឈើលើ ថ្មខាង​ក្រោម​រៀបឥដ្ឋ​ ត្រូវអគ្គីភ័យឆេះអស់ទាំងស្រុង។

ក្នុងរបាយការណ៍បញ្ជាក់ថា យោងតាម​សាក្សី​ និងជាអ្នកឃើញហេតុការណ៍​ដំបូង​ឃើញមានបុរសម្នាក់បានធ្វើសកម្មភាព​ដុតផ្ទះតែម្ដង​ បុគ្គលនោះមានឈ្មោះ ខឿន សុភីន ភេទប្រុ​ស អាយុ២១ឆ្នាំ ត្រូវជាកូនប​ង្កើ​ត​ តាមការបញ្ជាក់​ពីសមត្ថកិច្ច​ថា ​កូនដែលដុតផ្ទះខ្លួនឯ​ង​ គឺជាមនុ​ស្សមា​នសតិគ្រប់​គ្រាន់​ មិនមែនជាជនមានវិបល្លាសស្មារ​តី​ទេ​ នេះបើតាមការបញ្ជាក់ពីក្រុមគ្រួសារ​ និងអ្នកជិតខាង​ ប៉ុន្តែ​មូ​លហេតុ​ដែលនាំឱ្យកូនហ៊ាន យកភ្លើងដុតផ្ទះខ្លួននេះ​ គឺមកពីម្ដាយមិនបំពេញបំណងជូនកូន​(ទិញម៉ូតូ​មុនចូលឆ្នាំ)។

ក្នុងប្រតិបត្តិការជួយអន្តរាគមន៍ កម្លាំងនគរបាលបានប្រើប្រាស់រថយន្ដពន្លត់អគ្គិភ័យចំនួន០១គ្រឿង ប្រើទឹកអស់ចំនួន០២ឡាន។ ជនសង្ស័យត្រូវបានឃាត់ខ្លួនយកទៅសួរនាំ ​និងចំណាត់ការតាមនីតិវិធីច្បាប់៕

អត្ថបទ៖ សុខុម