មុនក្លាយជារដ្ឋលេខាធិការ តើលោក ផារ៉ា មង្គល កូន​ប្រុស លោក ជា សុផារ៉ា ធ្លាប់កាន់តួនាទីអ្វីខ្លះ?

លោក ផារ៉ា មង្គល ត្រូវបានព្រះមហាក្សត្រនៃកម្ពុជា ត្រាស់បង្គាប់តែងតាំងជារដ្ឋលេខាធិការក្រសួងរៀបចំដែនដី នគរូប នីយកម្ម និងសំណង់ កាលពីថ្ងៃទី៣០ ខែមីនា ឆ្នាំ២០២៣កន្លងទៅថ្មីៗនេះ។ មុនការតែងតាំងជារដ្ឋលេខាធិការនេះ តើលោក ផារ៉ា មង្គល ធ្លាប់បានកាន់តួនាទីអ្វីខ្លះ?

លោក ផារ៉ា មង្គល ត្រូវបានសាធារណជនស្គាល់យ៉ាងច្បាស់ថាជាកូនប្រុសតែម្នាក់របស់លោក ជា សុផារ៉ា ក្នុងចំណោមកូន​ប្រុសស្រី​ចំនួន ៤ នាក់។ លោក ជា សុផារ៉ា គឺជាមន្រ្តីជាន់ខ្ពស់ដ៏លេចធ្លោ​មួយ​រូប​ក្នុង​ជួររាជរដ្ឋាភិបាល ​និង​ចំណោមថ្នាក់ដឹកនាំនៃគណបក្សប្រជាជនកម្ពុជា។ បច្ចប្បន្ន លោក ជា សុផារ៉ា កំពុងកាន់តំណែងជាឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ខណៈអតីតកាលលោកក៏ធ្លាប់ធ្វើជាអភិបាល​រាជធានី​ភ្នំពេញ​ និងធ្វើជា​រដ្ឋមន្រ្តី​ក្រសួង​អភិវឌ្ឍ​ន៍ជបនបទដែរ។

តែយ៉ាងណា បើក្រឡេកមកមើលបទពិសោធការងារកូនប្រុសរបស់លោក គឺលោក ផារ៉ា មង្គល ក៏បានឆ្លងកាត់នូវតួនាទីមួយចំនួនផងដែរ មុនការតែងតាំងជារដ្ឋលេខាធិការក្រសួងរៀបចំដែនដី នៅពេលនេះ។ មុនឆ្នាំ២០១៦ លោក ផារ៉ា មង្គល ធ្លាប់បានបម្រើការងារនៅក្រសួងអភិវឌ្ឍន៍ជនបទ ក្នុងតួនាទីជាអគ្គនាយករងនៃអគ្គនាយកដ្ឋានរដ្ឋបាល និង ហិរញ្ញវត្ថុ ក្រោយមកលោកក៏បានផ្ទេរក្របខណ្ឌមកបម្រើការងារនៅក្រសួងរៀបចំដែនដី នគរូបនីយកម្ម និងសំណង់ ក្នុងតួនាទីជានាយកខុទ្ទកាល័យ ដែលឪពុករបស់លោកកាន់ជារដ្ឋមន្ត្រី៕

ដោយ៖ ធឿន វ៉ាន់សុង