សន្តិសុខសង្គម

ចាប់ខ្លួនអ្នកលក់អនឡាញម្នាក់ បញ្ជូនទៅតុលាការ ករណីហិង្សា និងរំលោភលំនៅឋាន អតីតម្ដាយក្មេក

បានផុស

៣ years មុន

នៅ

ថ្ងៃព្រហស្បតិ៍ ១៨ ឧសភា ២០២៣

ដោយ

ស្ត្រីម្នាក់ ជាអ្នកលក់ផលិតផលតាមអនឡាញ ត្រូវបានកម្លាំងសមត្ថកិច្ចនគរបាលខណ្ឌទួលគោកឃាត់ខ្លួន និងបញ្ជូនទៅសាលាដំបូងរាជធានីភ្នំពេញ កាលពីព្រឹកថ្ងៃទី ១៨ ខែឧសភា ឆ្នាំ ២០២៣ ពាក់ព័ន្ធការចោទប្រកាន់ពី«បទជេរប្រមាថជាសាធារណៈ បទហិង្សាដោយចេតនា និងបទរំលោភលំនៅឋាន តាមពាក្យបណ្ដឹងរបស់អតីតម្ដាយក្មេក»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ត្រីខាងលើមានឈ្មោះ ញឹម សុខឡេង ហៅ លូមី អាយុ ២៧ ឆ្នាំ ទីលំនៅក្នុងបុរី ប៉េងហួត បឹងស្នោ ផ្ទះលេខ ៤៧ ផ្លូវP២១ សង្កាត់-ខណ្ឌច្បារអំពៅ រាជធានីភ្នំពេញ។

អង្គហេតុ នៃការឃាត់ខ្លួនជនសង្ស័យបញ្ជូនទៅតុលាការ គឺនៅក្នុងពាក្យបណ្ដឹង បានបញ្ជាក់ថា កាលពីវេលាម៉ោង ១០ និង ៣០ នាទីយប់ ថ្ងៃទី ១៦ ខែឧសភា ឆ្នាំ ២០២៣ ឈ្មោះ ញឹម សុខឡេង ហៅ លូមី អតីតជាកូនប្រសា បានទៅធ្វើសកម្មភាពស្រែកជេរប្រមាថឡូឡា វាយទ្វារផ្ទះ ធ្វើឲ្យមានការភ្ញាក់ផ្អើលទាំងយប់។ ស្របពេលនោះដែរ ក្មេងនៅផ្ទះជាមួយបានបើកទ្វារ ក៏ឃើញឈ្មោះ ញឹម សុខឡេង ស្ទុះឡើងទៅលើផ្ទះជាន់ទី ១ ជួបអតីតម្ដាយក្មេកជាដើមបណ្ដឹង។ ពេលនោះអតីតម្ដាយក្មេក បានទទូចសួរទៅអតីតកូនប្រសាថា បើមានបញ្ហាអ្វីចាំទៅដោះស្រាយគ្នានៅចំពោះមុខសមត្ថកិច្ចដែលជាអាជ្ញាធរមូលដ្ឋាន នៅព្រឹកថ្ងៃស្អែកទៅ មិនគួរមករំខានដំណេកពួកគាត់ទាំងយប់នោះទេ។ ប៉ុន្តែទោះជាយ៉ាងណាក្តី ជនសង្ស័យមិនព្រមស្ដាប់ និងបានធ្វើសកម្មភាពប្រើអំពើហិង្សាយ៉ាងកំរោល ដោយយកកៅអីគប់ និងវាយទៅលើអតីតម្ដាយក្មេក បណ្ដាលឲ្យរបួសស្នាមត្រង់ដៃ និងស្មាខាងស្ដាំ។ បន្ថែមនោះ ជនសង្ស័យ បន្តជេរប្រមាថ វាយបំផ្លិចបំផ្លាញទ្រព្យសម្បត្តិ សម្ភារៈ និងវាយកម្ទេចគ្រឿងជាទីសក្ការបូជាដែលមានតម្លៃរបស់គ្រួសារដើមបណ្ដឹងទៀតផង។

លើសពីនេះទៀត ជនសង្ស័យ បានអុកឡុក ដោយហិង្សាទៅលើម្ដាយដើមបណ្ដឹង មានវ័យចំណាស់ អាយុ ៩៥ ឆ្នាំ ដែលសម្រាន្តនៅកន្ទេល ធ្វើឲ្យតក់ស្លុត ស្ទើរគាំងបេះដូងម្តងៗ និងត្រូវបញ្ជូនទៅកាន់មន្ទីរពេទ្យសង្គ្រោះបន្ទាន់ទាំងយប់។ ក្នុងនោះ ជនសង្ស័យ ក៏បានដឹងយ៉ាងច្បាស់ថា ជីដូនមានវ័យចំណាស់ចាស់ជរា និងមានជំងឺបេះដូងប្រចាំកាយ និងងាយរងការតក់ស្លុតបំផុត។

ពាក្យបណ្ដឹងបានបញ្ជាក់ទៀតថា ជនសង្ស័យជាមនុស្សមានអត្តចរិតកោងកាច តែងតែរករឿង បង្កជម្លោះតាំងពីមុនរៀបអាពាហ៍ពិពាហ៍ជាមួយកូនប្រុសគាត់។ ក្នុងនោះ ដោយពួកគេរស់នៅមិនចុះសម្រុងគ្នា ក៏មានការប្ដឹងសុំផ្ដាច់ចំណងអាពាហ៍ពិពាហ៍ រហូតដល់តុលាការបានចេញសាលក្រមលែងលះរួចរាល់ហើយ តែជនសង្ស័យនៅតាមបង្កបញ្ហាទៀត។ ដូចជានៅក្នុងអំឡុងខែមិថុនា ឆ្នាំ ២០២២ ជនសង្ស័យ ក៏ធ្លាប់បានធ្វើសកម្មភាពជេរប្រមាថទៅលើក្រុមគ្រួសារជាដើមបណ្ដឹងទាំងកណ្ដាលយប់ និងបានវាយកម្ទេចរថយន្តអស់ ២ គ្រឿង ដែលសកម្មភាពនោះកំពុងជាប់បណ្ដឹងនៅតុលាការទៀតផង។ សំណុំរឿងខាងលើនេះ បានស្ថិតនៅលោក ទី មុនិន្ទ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កំពុងបើកការស៊ើបសួរ ដែលការស៊ើបសួរនៅមិនទាន់បញ្ចប់នៅឡើយទេ៕

អត្ថបទ ៖ មករា

Related Topics:ចាប់ខ្លួន ករណីហិង្សា

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា