ព័ត៌មានអន្ដរជាតិ

ឥណ្ឌូណេស៊ី នឹងហាមឃាត់មិនឲ្យប្រើថង់ប្លាស្ទិកនៅចុងឆ្នាំ ២០២៩

បានផុស

៣ years មុន

នៅ

ថ្ងៃពុធ ៧ មិថុនា ២០២៣

ដោយ

ប្រទេសឥណ្ឌូណេស៊ីគ្រោងនឹងចាប់ផ្តើមវិធានការដាក់បម្រាមទៅលើផលិតផលថង់ប្លាស្ទិកដែលប្រើតែមួយដងបោះចោលនៅចុងឆ្នាំ ២០២៩ ហើយក៏តម្រូវឲ្យក្រុមហ៊ុនផលិតត្រូវមានកាតព្វកិច្ចកាត់បន្ថយការប្រើប្រាស់វេចខ្ចប់ប្លាស្ទិកចំនួន ៣០ ភាគរយផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី Siti Nurbaya Bakar រដ្ឋមន្ត្រីក្រសួងបរិស្ថាន និងព្រៃឈើរបស់ប្រទេសឥណ្ឌូណេស៊ី បាននិយាយថា ការហាមប្រាមនឹងរួមបញ្ចូលថង់ផ្លាស្ទិកសម្រាប់ដាក់ទំនិញដែលប្រើតែមួយដងឈប់ប្រើ ទុយោប្លាស្ទិក ក៏ដូចជាស្លាបព្រា និងចានជ័រជាដើម ។

លោកស្រីបញ្ជាក់ថា នេះគឺជាមធ្យោបាយដោះស្រាយជាមួយបញ្ហាកាកសំណល់វេចខ្ចប់ដែលពិបាកក្នុងការប្រមូល ពិបាកក្នុងការកែច្នៃឡើងវិញ និងមានជាតិបំពុលដល់បរិស្ថានជាដើម ។ បន្ថែមពីនេះ វិស័យឯកជនក៏ត្រូវតែចូលរួមចំណែកកាត់បន្ថយឲ្យបាន ៣០ ភាគរយផងដែរសម្រាប់នៅឆ្នាំ ២០២៩ នោះ ។

កាលពីឆ្នាំ ២០១៩ កោះបាលីបានក្លាយជាកន្លែងដំបូងបង្អស់របស់ឥណ្ឌូណេស៊ី ដែលដាក់បម្រាមលើការប្រើប្រាស់ថង់ប្លាស្ទិក ទុយោប្លាស្ទិក និងប្រភេទចានស្នោ ក៏ដូចជាប្លាស្ទិកផ្សេងៗជាដើម ។ ទន្ទឹមនឹងនេះ រដ្ឋធានីហ្សាកាតាបានចេញបម្រាមនេះរួចទៅហើយនៅឆ្នាំ ២០២០ ប៉ុន្តែទោះជាយ៉ាងណា ទីក្រុងមួយនេះនៅតែអនុញ្ញាតឲ្យប្រើប្រាស់ផលិតផលប្លាស្ទិកមួយចំនួន ។

គួរឲ្យដឹងថា ឥណ្ឌូណេស៊ីជាប្រទេសមួយក្នុងចំណោមប្រទេសផលិតកាកសំណល់ប្លាស្ទិកកំពូលក្នុងពិភពលោក ។ កាលពីឆ្នាំមុន ប្រទេសដែលមានប្រជាជនចំនួន ២៧០ លាននាក់មួយនេះ បានផលិតកាកសំណល់ប្លាស្ទិកចំនួន ១២.៦ លានតោន ខណៈការកែឆ្នៃឡើងវិញមានតែ ៩ ភាគរយប៉ុណ្ណោះ ៕