រុស្ស៊ី លើកមូលហេតុដែល អាមេរិក បន្តផ្ដល់អាវុធឥតឈប់ឈរឲ្យ អ៊ុយក្រែន

ឯកអគ្គរដ្ឋទូតរុស្សីប្រចាំនៅសហរដ្ឋអាមេរិក លោក Anatoly Antonov បានលើកឡើងពីមូលហេតុដែលសហរដ្ឋអាមេរិកនៅតែបន្តផ្គត់ផ្គង់សព្វាវុធឥតឈប់ឈរទៅឲ្យរដ្ឋាភិបាលអ៊ុយក្រែន ស្របពេលដែលជម្លោះជាមួយរុស្ស៊ី នៅតែអូសបន្លាយពេល ។

លោក Antonov បាននិយាយកាលពីថ្ងៃពុធថា មូលហេតុដែលសហរដ្ឋអាមេរិកបន្តផ្គត់ផ្គង់សព្វាវុធទៅឲ្យអ៊ុយក្រែន ដោយសារតែរដ្ឋាភិបាលទីក្រុងវ៉ាស៊ីនតោន ចង់ឃើញការបង្ហូរឈាម និងបង្កឲ្យមានសង្គ្រាមលោកលើកទី៣ ។

លោកបានបន្ថែមថា “ទន្ទឹមនឹងនោះ សហរដ្ឋអាមេរិកចាត់ទុកវាជាកិច្ចការដែលពាក់ព័ន្ធទៅនឹងបស្ចិមប្រទេសក្នុងការចូលរួមក្នុងជម្លោះមួយនេះ ទើបពួកគេបន្តអូសបន្លាយការបង្ហូរឈាម និងជំរុញឲ្យមានសង្គ្រាមលោកលើកទី៣” ។

លោក​បាន​និយាយ​ថា​ “​បច្ចុប្បន្ន​អាមេរិកកំពុង​ខ្ជះខ្ជាយ​ប្រាក់​ចំណាយលើការជួយដល់​អ៊ុយក្រែន ។ លោកទទួលស្គាល់ថា មន្ទីរបញ្ចកោណមានលទ្ធភាពរាប់ពាន់លានដុល្លារនៃការផ្គត់ផ្គង់ដល់យោធាទីក្រុងកៀវ ប៉ុន្តែអាមេរិកក៏គួរទុកការចំណាយនេះ ទៅជួយដល់តំបន់ដែលអត់អាហារផងដែរ” ។

ជាចុងក្រោយអ្នកការទូតរូបនេះបានកត់សម្គាល់ថា “អាមេរិកបានបែងចែកមូលនិធិដែលមិនធ្លាប់មានពីមុនមក ទុកសម្រាប់ទិញអាវុធផ្ដល់ឲ្យរដ្ឋាភិបាលទីក្រុងកៀវ ប៉ុន្តែងាកទៅមើលបណ្តាប្រទេសក្រីក្របំផុតនៅអាហ្វ្រិក អាមេរិកឡាទីន និងអាស៊ី មានមនុស្សស្លាប់ច្រើនណាស់ ដោយសារការអត់អាហារ និងរង់ចាំជំនួយពីអាមេរិក” ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ថា ប្រតិបត្តិការកម្ចាត់កងទ័ព អ៊ុយក្រែន ត្រូវបានបញ្ចប់