KPT+

វត្ថុសិល្បៈ ៣ ប្រភេទ នឹងដាក់បង្ហាញនៅសារមន្ទីរព្រះនរោត្ដមសីហនុ-អង្គរ មួយឆ្នាំពេញ

បានផុស

៣ years មុន

នៅ

ថ្ងៃព្រហស្បតិ៍ ២៩ មិថុនា ២០២៣

ដោយ

ក្រសួងវប្បធម៌ និងវិចិត្រសិល្បបានឱ្យដឹងថា វត្ថុសិល្បៈចំនួន ៣ ប្រភេទ នឹងរៀបចំពិព័រណ៍បង្ហាញនៅសារមន្ទីរព្រះនរោត្ដមសីហនុ-អង្គរ រយៈពេលមួយឆ្នាំពេញគឺចាប់ពីខែកក្កដា ឆ្នាំ២០២៣ រហូតដល់ខែមិថុនា ឆ្នាំ២០២៤។

ចាប់ពីថ្ងៃទី០៣ ខែកក្កដា ឆ្នាំ២០២៣ រហូតដល់ថ្ងៃទី៣១ ខែមិថុនា ឆ្នាំ២០២៤ សារមន្ទីរព្រះនរោត្ដមសីហនុ-អង្គរ នឹងរៀបចំតាំងពិព័រណ៍បង្ហាញកុលាលភាជន៍ និងវត្ថុសិល្បៈជាច្រើនប្រភេទ ដែលពលរដ្ឋរស់នៅក្នុងតំបន់អង្គរប្រគល់ជូនសារមន្ទីរ ដើម្បីបង្ហាញដល់សាធារណជនចូលទស្សនាសិក្សាស្វែងយល់។

លោក ខួយ សាវឿត នាយកស្តីទីនៃសារមន្ទីរព្រះនរោត្ដមសីហនុ-អង្គរ បានឱ្យដឹងថា កុលាលភាជន៍ចំនួន ១៦ ដែលនឹងធ្វើការបង្ហាញនាពេលខាងមុខ គឺជាប្រភេទកុលាលភាជន៍រឹង មានស្រទាប់រលោងពណ៌ត្នោត និងពណ៌បៃតង ដោយភាជន៍ ទាំងនេះត្រូវគេដុតក្នុងឡកំដៅចន្លោះពី ១,០០០ ទៅ ១,២០០ អង្សាសេ។

លោក ខួយ សាវឿត បានបន្តថា ភាជន៍ទាំង ១៦ មានប្រភពមកពីភូមិចំនួន ៨ ក្នុងភូមិសាស្ត្រខេត្តសៀមរាប។ ក្រៅពីកុលាលភាជន៍ និងវត្ថុសិល្បៈមួយចំនួនស្ថិតនៅសម័យបុរេប្រវត្តិសាស្ត្រ ដែលជាវត្ថុសក្ការសម្រាប់បញ្ចុះនៅតាមប្រាសាទ រួមទាំងវត្ថុសិល្បៈដែលទទួលបានពីវត្តអារញ្ញរង្សី ដែលជាប្រភេទវត្ថុសិល្បៈមានអាយុកាលខុសៗគ្នានិងមានប្រភពផ្សេងៗគ្នាផងដែរ។

ជាថ្មីម្តងទៀត ចំពោះសាធារណជន សិស្សានុសិស្ស និសិ្សត លោកគ្រូ-អ្នកគ្រូ និងអ្នកស្រាវជ្រាវ អាចមកសិក្សាស្វែងយល់ឱ្យបានកាន់តែច្បាស់អំពីប្រវត្តិនៃវត្ថុ សិល្បៈទាំងនេះ ដោយមានមន្ត្រីជំនាញ ចាំធ្វើបទបង្ហាញអំពីព័ត៌មានថ្មីៗ ទាក់ទងនិងការស្រាវជ្រាវ ការប្រតិបត្តិសាសនា វិស័យពាណិជ្ជកម្ម និងការចូលរួមចំណែករបស់ប្រជាជន ក្នុងការថែរក្សាវត្ថុបុរាណ និងសម្បត្តិបេតិកភណ្ឌជាតិប្រកបដោយនិរន្តរភាព៕